Semeı ormanyna órt qoıǵandar izdestirilýde
SEMEI. QazAqparat - «Semeı ormany» memlekettik tabıǵı rezervatynda bolǵan órtke qatysy bar turǵyndardy polıtsııa qyzmetkerleri izdeýge kiristi, dep habarlaıdy QazAqparat.
Semeı qalalyq Tótenshe jaǵdaılar basqarmasy is boıynsha materıaldardy ishki ister basqarmasyna ótkizgen. Eger kináli azamattar anyqtalsa, QR Qylmystyq Kodeksiniń 204- baby, 2-tarmaǵy boıynsha jaýapqa tartylady. Al eger kinási dálendense 2 myń aılyq eseptik kórsetkish kóleminde aıyppul salynady nemese 2 jylǵa deıingi merzimge bas bostandyǵynan aıyrylýy múmkin.
«Bótenniń múlkin abaısyzda joıý nemese búldirý baby boıynsha is qozǵaldy. Qazir polıtsııa qyzmetkerleri tekserý, izdeý jumystaryn júrgizip jatyr. Eger kináli turǵyndar anyqtalsa zań aıasynda jaýapkershilikke tartylatyn bolady», - dedi Semeı qalalyq ІІB memlekettik til jáne aqparat bóliminiń jetekshisi Elýbek Ospanov.
Esterińizge sala keteıik, 21 mamyr kúni «Semeı ormany» tabıǵı rezervaty aýmaǵyndaǵy qaraǵaı ormany órtengen bolatyn.
Saldarynan 300 gektar aýmaq janyp ketti. Al tilsiz jaýdy aýyzdyqtaýǵa 70-ten astam tehnıka men 350-ge jýyq adam jumyldyryldy.
