Semeı ormanyn qalpyna keltirýge 30-40 jyl ýaqyt kerek – sarapshy

ASTANA. QazAqparat – Elimizdegi orman sharýashylyǵynyń jaı-kúıi qandaı? Semeı rezervatyndaǵy órt adamı shyǵyndy aıtpaǵanda, tabıǵatqa, ekologııaǵa qandaı zalal keltiredi? Ormandy qalpyna keltirýge qansha ýaqyt kerek? Osy jáne ózge de suraqtarǵa «Baitaq» jasyldar partııasynyń qyzmetkeri, tabıǵat janashyry Ǵanı Nazarbek Jibek Joly telearnasyna bergen arnaıy suhbatynda jaýap berdi, dep habarlaıdy QazAqparat tilshisi.

«Jalpy elimizdegi orman sharýashylyǵynyń háli nashar dep aıtýǵa bolady. Óıtkeni, birinshi kezekte ormanshylardyń ál-aýqaty bul jalaqy máselesi, odan keıin tehnıkalyq materıaldyq jaǵdaılary, ol orman órtin óshirý barysynda kórinip tur. Aýqymdy orman órtimen kúresýge múlde daıyn emespiz. Tek qana ormanshylar emes bul tótenshe jaǵdaılar qyzmetkerlerine de qatysty. Jaqyn arada kásibı ormanshylardan aırylamyz dep oılaımyn. Óıtkeni bizdiń qazirgi orman sharýashylyǵynda jasap jatqan saıasatymyz aldaǵy ýaqytta jas mamandardyń bul salaǵa múlde kelmeýine alyp keledi. Qazirdiń ózinde osy orman sharýashylyǵyn bitirgen azamattar, túrli basqa salalarǵa ketip jatyr», - dedi Ǵanı Nazarbaev efır barysynda.

Onyń aıtýynsha, másele áleýmettik qoldaý kórsetý sharalarymen baılanysty. ıAǵnı orman qyzmetkerleri áleýmettik turǵydan qorǵalmaǵan.

«1 shildeden bastap jalaqyny ósiremiz degen. Qazir orman órt sóndirýshilerdiń aılyǵy 60 myń teńge, olar arnaıy kıimmen de qamtamasyz etilmeıdi. Al órttiń epıtsentrinde temperatýra myń gradýsqa jýyqtaıdy. Osyndaı jaǵdaılarda arnaıy kıimsiz orman órtin óshirýge bolady? Ol maýsymdyq orman órt sóndirýshiler belgili bir ýaqytqa ǵana alynady, bir aı nemese jarty jylǵa. Kelesi jyly olardyń tipti jartysy da bul salaǵa jumysqa kelmeıdi. Olar daıyndyqtan ótpeıdi. Arnaıy kıimmen, qural jabdyqpen jabdyqtalmaǵan. Kelesi jyly budan da qatty órtter bolýy múmkin. Óıtkeni qazir ǵalamdyq jylý temperatýranyń kórsetkishi jyldan jylǵa ósip jatyr. Qurǵaqshylyq bizdi jyl saıyn qysa beredi. Al biz osy qurǵaqshylyqqa osy ǵalamdyq jylynýǵa daıyn emespiz. Oǵan beıimdele almaı jatyrmyz», - deıdi spıker.

Sondaı-aq, tabıǵat janashyry Semeıdegi orman órtiniń saldaryn joıýǵa qatysty pikirimen bólisti.

«Jumys durys jolǵa qoıylǵannyń ózinde ormandy qalpyna keltirýge 30-40 jyl ýaqyt kerek. Biraq ormandaǵy ekologııalyq jaǵdaıdy qalpyna keltirý óte qıynǵa soǵady. Memleket basshysynyń tapsyrmasy boıynsha 2 mlrd túp aǵash otyrǵyzýymyz kerek. Biraq qazirgi tańda ósip turǵan ormanymyzdy saqtap qalý máselesi odan da mańyzdy bolyp tur. Ol úshin biz ormandardyń arnasyn biz mynaý Semeı ormanynda úlken ormandardyń arasyn bólý jumystaryn júrgizý sekildi. Bir jerde ot tutansa 5-6 myń gektar jer janyp, kelesi bir ýchaskege ótpeıtindeı aralaryn ashý kerek sııaqty. Óıtkeni qarasańyz bir jerde órt bolsa ol toqtamaıdy. Búkil ormandy qazir sharpyp bara jatyr. Ol jerde tek orman aǵashtar ǵana emes, ol jerde myńdaǵan qustar. Qazir qustardyń jumyrtqalaý ıaǵnı balapandaý kezeńi. Odan keıin omyrtqasyzdar bar. Olardyń bári qazir qyrylyp qaldy. Jalpy ekojúıe qazir óte úlken shyǵynǵa ushyrap otyr. Ony esepteý óte qıyn», - deıdi ol.