«Semeı ormany» basshylyǵy orman órtine qatysty pikir bildirdi
SEMEI. QazAqparat - «Semeı ormany» tabıǵı rezervaty aýmaǵyndaǵy órt shyǵýyna qatysty qoryqtyń bas dırektory Murat Dáýletov pikir bildirdi, dep habarlaıdy QazAqparat.
Esterińizge sala ketsek, 21 mamyr kúni saǵat 14.00-de «Semeı ormany» tabıǵı rezervaty aýmaǵynan órt shyǵyp, qaraǵaı ormany órtengen edi.
Órttiń jalpy aýmaǵy 300 sharshy metr. Tilsiz jaýdy sóndirýge 350 adam jáne 40 arnaıy tehnıka jumyldyryldy. Qazir órt tolyq óshirildi. Degenmen mamandar kezekshilik atqaryp, ormandaǵy jaǵdaıdy baqylaýda. Órtengen aýmaq qaıta qalpyna keltiriletin bolady. Ázirge shyǵyn kólemi belgisiz. Muny arnaıy komıssııa esepteıdi.
«Saǵat 13.50-de Energetık aýdanyndaǵy órt baqylaý munarasy aýmaqta tútin shyǵa bastaǵanyn baıqaǵan. Saǵat 14.08-de órt sóndirýshiler óshirýge kiristi. Bizge qosymsha kómektiń qajet emes ekenin aıtty. Biraq, órt ushqyny tarap, odan saıyn kúsheıgen. Qoıý tútinnen eshteńe kórinbeı, qaı jer janyp jatqanyn anyqtaý qıynǵa túsip ketti. Sondyqtan 2 tikushaqty kómekke shaqyrdyq. Saǵat 19.50-de órtti sóndirdik. Aıta ketý kerek, órtti óshirýge qatty jel de kedergi keldirdi. Qazir oqıǵa ornynda baqylaý júrgizilip, mamandar jumys istep jatyr», - dedi «Semeı ormany» tabıǵı rezervatynyń bas dırektory Murat Dáýletov.
Mamandar órttiń shyǵýyna adam kináli degen boljam jasap otyr. Jaz shyqsa, ormanǵa demalýǵa keletinder sany artady. Biraq, turǵyndar órt qaýipsizdik erejelerin saqtaımaıdy. Qoqys qaldyqtaryn jaǵyp, temeki tuqylyn tastap júre beredi. Sondyqtan orman sharýashylyǵynyń basshylyǵy turǵyndardan qaýipsizdik erejelerin saqtaýdy suraıdy.
