Semeı ormanynyń 80 qyzmetkerine 41 mln teńge jalaqy qaryzy tólendi
ASTANA. KAZINFORM — Abaı oblysynyń prokýrorlary «Semeı ormany» memlekettik orman tabıǵı rezervatynyń 80 qyzmetkeriniń quqyqtaryn qalpyna keltirdi.
Borodýlıha aýdanynyń prokýratýrasy áleýmettik jelilerge júrgizilgen monıtorıng barysynda «Semeı ormany» memlekettik orman tabıǵı rezervaty qyzmetkerleriniń eńbek quqyqtarynyń buzylǵanyn anyqtady. Atap aıtqanda, jalaqynyń uzaq ýaqyt boıy tólenbegeni belgili boldy.
Aýdandyq ınternet-platformalardyń birinde kásiporyn jumysshylaryna eńbekaqy tóleý merzimderiniń keshiktirilgeni týraly jarııalanym ornalastyrylǵan. Osy aqparat negizinde prokýratýraǵa resmı ótinishter kelip túspegenine qaramastan, aýdan prokýratýrasy eńbek zańnamasy talaptarynyń saqtalýyna bastamashylyq tártippen taldaý júrgizdi.
— Tekserý nátıjesinde fılıaldyń 80 qyzmetkeri aldynda jalpy somasy 41 mln teńgeden asatyn jalaqy boıynsha bereshek qalyptasqany anyqtaldy. Prokýrorlyq qadaǵalaý aktisi boıynsha jalaqy boıynsha bereshek tolyq kólemde ótelip, fılıal basshysy ákimshilik jaýaptylyqqa tartyldy. Qabyldanǵan sharalardyń nátıjesinde 80 qyzmetkerdiń eńbek quqyqtary qalpyna keltirilip, olarǵa tıesili eńbekaqy tolyq kólemde tólendi, — delingen habarlamada.
Oblys prokýratýrasy azamattardy eńbek zańnamasynyń buzylý faktileri, onyń ishinde jalaqy tóleýdiń keshiktirilýi týraly ýaqtyly habarlaýǵa shaqyrady. Ol úshin ýákiletti memlekettik organdarǵa nemese prokýratýra organdaryna júginý qajet. Bul buzylǵan quqyqtardy jedel qalpyna keltirý boıynsha sharalar qabyldaýǵa múmkindik beredi.
Osyǵan deıin «Semeı ormany» rezervatynda jańa tehnıka satyp alýǵa 3,1 mlrd teńge qarjy bólingeni belgili boldy.
