Semeı ormanyndaǵy órtti sóndirýge 769 adam men 8 tikushaq jumyldyryldy
ASTANA. KAZINFORM – «Semeı ormany» memlekettik orman tabıǵı rezervatyndaǵy orman órtin sóndirý jumystary táýlik boıy úzdiksiz jalǵasyp jatyr, dep habarlaıdy Ekologııa jáne tabıǵı resýrstar mınıstrligi.
Mınıstrliktiń málimetinshe, 17 shilde saǵat 08:00-degi jaǵdaı boıynsha órtti sóndirýge 769 adam, 191 birlik jerústi tehnıkasy jáne 8 tikushaq tartylǵan.
– Ekologııa jáne tabıǵı resýrstar mınıstri Erlan Nysanbaev pen Abaı oblysynyń ákimi Berik Ýálı órt aýmaǵyn tikushaqpen áýeden baqylap shyqty. Jaǵdaı turaqty baqylaýda, jekelegen tútin oshaqtaryn sóndirý jumystary júrgizilýde, – delingen mınıstrlik habarlamasynda.
Túngi ýaqytta órt sóndirýshiler órttiń búkil perımetri boıynsha jumys júrgizip, onyń ári qaraı taralýyna jol bermeý úshin shetin qorshap, sóndirgen.
Tańerteń jetýi qıyn aýmaqtardaǵy órt oshaqtaryn sóndirý úshin jaıaý desant jiberilip, áýe tehnıkasynyń kómegimen sý tógý jumystary jalǵasqan.
– Qazirgi ýaqytta órt oshaǵynda ashyq janý baıqalmaıdy. Jekelegen tútindeý oshaqtaryn sóndirý jalǵasýda. Órt bastalǵaly beri avıatsııa arqyly 243 ret sý tógilip, jalpy kólemi 546 tonna sý jetkizildi, – dep málimdedi Ekologııa jáne tabıǵı resýrstar mınıstrligi.
Aıta keteıik, buǵan deıin Semeı ormanyndaǵy órt oshaǵyna 291 tonna sý tógilgeni málim boldy.
