Semeı ormanyndaǵy órt: jalyn 60 gektar aýmaqty sharpydy
SEMEI. KAZINFORM — «Semeı ormany» memlekettik orman tabıǵı rezervatynda orman órtin sóndirý jumystary jalǵasyp jatyr.
— Saǵat 14:50–degi jaǵdaı boıynsha órtti sóndirýge rezervattyń memlekettik orman kúzetiniń 97 qyzmetkeri men 38 tehnıkasy, Tótenshe jaǵdaılar mınıstrliginiń 158 qyzmetkeri men 22 tehnıkasy, Іshki ister mınıstrliginiń 101 qyzmetkeri men 25 tehnıkasy, sondaı-aq «Qazavıaormanqorǵaý» RMQK-nyń eki tikushaǵy, Qorǵanys mınıstrliginiń Mı-17 jáne Ulttyq qaýipsizdik komıtetiniń Mı-8 tikushaqtary jumyldyryldy, — delingen habarlamada.
Jalpy áýe tehnıkasymen 82 ret sý tógildi. Onyń ishinde «Qazavıaormanqorǵaý» RMQK tikushaqtary — 58 ret, QR Qorǵanys mınıstrliginiń Mı-17 tikushaǵy — 19 ret, QR UQK-niń Mı-8 tikushaǵy — 5 ret sý tógý jumystaryn oryndady.
Aldyn ala málimet boıynsha, órttiń aýdany shamamen 60 gektar. Órt qaraǵaıly orman alqabynda tirkelgen, keı jerlerde tómengi órt joǵarǵy órtke ulasyp jatyr.
Qazirgi ýaqytta órtti oqshaýlaý jáne tolyq sóndirý jumystary jalǵasyp jatyr. Premer-mınıstr jaǵdaıdy jeke baqylaýynda ustap otyr. Jaýapty memlekettik organdardyń basshylary saǵat saıyn jedel baıandama usynyp otyr.
Eske salsaq, osyǵan deıin «Semeı ormany» rezervatynda órt shyqqan soń lagerdegi 200-ge jýyq bala evakýatsııalanǵany habarlanǵan.
