Semeı ormanyndaǵy órt: tikushaqtar men qosymsha kúshter jumyldyryldy
ASTANA. KAZINFORM – «Semeı ormany» memlekettik orman tabıǵı rezervatynyń aýmaǵynda shyqqan orman órtin sóndirý jumystary jalǵasyp jatyr, dep habarlaıdy Ekologııa jáne tabıǵı resýrstar mınıstrligi.
Mınıstrliktiń málimetinshe, órt 16 shilde kúni saǵat 09:45-te «Semeı ormany» memlekettik orman tabıǵı rezervaty Borodýlıha fılıaly Qamyshen ormanshylyǵynyń 57-oramynda tirkelgen.
– Qazirgi ýaqytta órtti sóndirýge memlekettik orman kúzetiniń 7 qyzmetkeri, 1 avtotsısterna, 1 kishi orman órt sóndirý patrýldik kesheni, 1 traktor, Tótenshe jaǵdaılar mınıstrliginiń 30 qyzmetkeri men 8 tehnıkasy, sondaı-aq «Qazavıaormanqorǵaý» RMQK-nyń Bambi Bucket sý tógý qurylǵysymen jabdyqtalǵan áýe kemesi jumyldyryldy, – delingen mınıstrlik aqparatynda.
Órt oshaǵyna qosymsha kúsh retinde 2 avtotsısterna, 2 traktor, 1 kishi orman órt sóndirý patrýldik kesheni jáne 11 orman kúzeti qyzmetkeri jiberildi. Sonymen qatar AS350 tikushaǵy men 4 áýe órt sóndirý desantshysy, sondaı-aq Katonqaraǵaıdan Mı-8 tikushaǵy jolǵa shyqqan.
– Qazirgi ýaqytta órtti oqshaýlaý jáne sóndirý jumystary jalǵasýda. Jaǵdaı baqylaýda, – dep málimdedi Ekologııa jáne tabıǵı resýrstar mınıstrligi.
Aıta keteıik, ShQO-da órt qaýpine baılanysty ormandardyń birine kirýge tyıym salyndy.
