Semeı ormanyndaǵy órt: 800-den astam adam men 8 áýe kemesi jumyldyryldy
ASTANA. KAZINFORM – Tótenshe jaǵdaılar mınıstrligi «Semeı ormany» memlekettik tabıǵı rezervaty aýmaǵynda bolǵan iri orman órtin sóndirý operatsııasynyń nátıjesin jarııalady. Órtti aýyzdyqtaýǵa 800-den astam adam, 204 tehnıka jáne 8 áýe kemesi jumyldyrylǵan.
– Órt anyqtalǵannan keıin kúshter men quraldar jedel túrde toptastyrylyp, jedel shtab quryldy. Barlyq memlekettik organdardyń ózara is-qımyly uıymdastyryldy, – dedi Erlan Tóregeldıev.
Operatsııaǵa Tótenshe jaǵdaılar mınıstrligimen qatar Ekologııa jáne tabıǵı resýrstar mınıstrligi, Іshki ister mınıstrligi, Qorǵanys mınıstrligi, UQK Shekara qyzmeti, jergilikti atqarýshy organdar men orman sharýashylyǵynyń bólimsheleri qatysty.
Órtti sóndirýde avıatsııa negizgi ról atqardy. Áýe tehnıkasy 380 márte sý tógip, órt oshaqtaryna shamamen 900 tonna sý jetkizdi.
– Qabyldanǵan jedel sheshimder men barlyq qyzmetterdiń úılesimdi jumysynyń arqasynda órt oqshaýlanyp, onyń ári qaraı taralýyna jol berilmedi. Eń bastysy – eldi mekenderge qaýip tóngen joq jáne azamattardyń qaýipsizdigi qamtamasyz etildi, – dedi komıtet tóraǵasy.
Qazirgi ýaqytta órt oshaǵynda qaıta tutanýdyń aldyn alý maqsatynda sý sebý jáne kúzet jumystary jalǵasyp jatyr. Mınıstrlik barlyq sheshimder áýe barlaýy men úzdiksiz monıtorıng derekteri negizinde naqty ýaqyt rejıminde qabyldanǵanyn atap ótti.
Eske sala keteıik, buǵan deıin, Semeı ormanyndaǵy órt 60 gektar aýmaqty sharpydy.
Sonymen qatar «Semeı ormany» rezervatynda órt shyqqan soń lagerdegi 200-ge jýyq bala evakýatsııalandy.
Premer-mınıstrdiń tapsyrmasymen eki mınıstr «Semeı ormanyna» attanǵan edi.
