Semeı ormanyndaǵy alapat órtten keıin qorǵaý júıesi qalaı kúsheıtildi
ASTANA. KAZINFORM — 2023 jyly iri orman órtinen keıin «Semeı ormany» rezervatyn tilsiz jaýdan qorǵaý boıynsha qandaı jumystar atqaryldy?
Bul saýaldy Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Maqsat Elemesovke qoıǵan edik.
— 2023 jylǵy órt «Semeı ormany» rezervatynyń ǵana emes, búkil memlekettik orman sharýashylyǵynyń materıaldyq-tehnıkalyq bazasyna qatysty birqatar máseleni kórsetti. «Semeı ormanyna» keler bolsaq, 2023 jyldan bastap búgingi kúnge deıin 10 jańa KAMAZ markaly órt sóndirý avtotsısternasy, 26 shaǵyn orman órt sóndirý kesheni, túrli modıfıkatsııadaǵy shamamen 30 dóńgelekti traktor satyp alyndy, — dedi Maqsat Elemesov ortalyq kommýnıkatsııalar qyzmeti alańynda ótken baspasóz máslıhatynda.
Mınıstrlik ókiliniń málimdeýinshe, orman rezervaty qyzmetkerleri 100% órt sóndirý arnaıy kıimmen qamtamasyz etildi. Sonymen qatar, BUU Damý baǵdarlamasy tarapynan shamamen 160 dıapazonyndaǵy radıostantsııa (mobıldi jáne tasymaldanatyn) tegin berilgen. Sondaı-aq demeýshiler «Semeı ormanyna» 4 GAZ-3308 órt sóndirý avtotsısternasyn tabystady.
Búginde «Semeı ormanynyń» balansynda 79 órt sóndirý avtotsısternasy bar, bul normadan (66 tehnıka) artyq. Alaıda onyń jartysyna jýyǵynyń paıdalaný merzimi ótken jáne tozý deńgeıiniń joǵary bolýyna baılanysty esepten shyǵarylýy tıis.
— Osy oraıda bıyl lızıng aıasynda ótimdiligi joǵary, syıymdylyǵy úsh tekshe metr bolatyn 34 jańa órt sóndirý avtotsısternasy satyp alynbaq. Bul tehnıka qozǵalys barysynda órtti sóndire alady. Qazir satyp alý rásimi júrip jatyr. Tehnıkalardy tamyzdyń sońyna deıin «Semeı ormany» rezervatynyń qarýly quramyna jetkiziledi dep josparlap otyrmyz, — dedi Maqsat Elemesov.
Sondaı-aq, spıker bıyl rezervat aýmaǵynda 37 órtti erte anyqtaý júıesiniń kameralary ornatylǵanyn tilge tıek etti. Qazir bul jabdyq synaq rejıminde jumys istep tur. «Semeı ormany» qylqan japyraqty alqaptarynyń búkil aýmaǵy erte órt anyqtaý júıesimen tolyq qamtylmaq.
Odan bólek, komıtet tóraǵasy orynbasarynyń aıtýynsha, áýe monıtorıngi men órt sóndirý jumysyna syıymdylyǵy bir tekshe metr bolatyn sý tógetin qurylǵysy bar ekinshi klasty eki tikushaq jumyldyrylǵan. Sonymen qatar, Semeı qalasyndaǵy áýejaıda bes tekshe metrge deıin sý tóge alatyn eki Mı-8 tikushaǵy táýlik boıy kezekshilik etedi. Tótenshe jaǵdaı týyndaǵanda Qorǵanys mınıstrligi men Ulttyq qaýipsizdik komıteti avıatsııasynyń kúshi men quralyn tartý múmkindigi bar.
Buǵan deıin «Semeı ormany» rezervatyna órtti erte anyqtaý júıesi engiziletini týraly habarlaǵan edik.
Sondaı-aq Abaı oblysynyń ákimdigi «Semeı ormany» tabıǵı rezervatynda kadr tapshylyǵy máselesin kóterdi.