«Semeı ormanynda» naızaǵaıdan eki órt shyqty
ASTANA. KAZINFORM – 2 shildede «Semeı ormany» memlekettik orman tabıǵı rezervatynyń aýmaǵynda eki orman órti tirkeldi, dep habarlaıdy Orman sharýashylyǵy jáne janýarlar dúnıesi komıteti.
Vedomstvonyń málimetinshe, órt oshaqtary ormandaǵy órtti erte anyqtaý júıesi arqyly der kezinde anyqtalyp, jedel áreket etý nátıjesinde qysqa ýaqyt ishinde oqshaýlanyp, tolyq sóndirilgen.
«Órttiń shyǵý sebebi – naızaǵaı razrıady. Sońǵy kúnderi rezervat aýmaǵynda naızaǵaıly fronttardyń ótýine baılanysty orman órtteriniń týyndaý qaýpi saqtalýda», – delingen habarlamada.
Orman sharýashylyǵy jáne janýarlar dúnıesi komıteti órt qaýipti maýsymda tabıǵat aıasynda demalý kezinde qaýipsizdik talaptaryn qatań saqtaýǵa shaqyrdy.
Aıta keteıik, keshe «Semeı ormany» rezervatynda bir kúnde úsh orman órti tirkelgen bolatyn.
