Semeı ormanynda aǵashty zańsyz kesýdiń 6 faktisi tirkeldi
ASTANA. KAZINFORM — «Semeı ormany» aýmaǵynda prokýrorlar júrgizgen reıdter barysynda 30-dan astam zań buzýshylyq anyqtaldy.
Borodýlıha aýdanynyń prokýratýrasy «Semeı ormany» memlekettik orman tabıǵı rezervatynyń aýmaǵynda orman qoryn qorǵaý jáne zańdylyqty qamtamasyz etý maqsatynda turaqty túrde reıdtik is-sharalar júrgizedi.
— Reıdtik is-sharalardyń nátıjesinde aǵashtardy zańsyz kesýdiń 6 faktisi anyqtaldy. Onyń 3 faktisi boıynsha sotqa deıingi tergep-tekserý bastalsa, qalǵan 3 fakti boıynsha ákimshilik is júrgizý qozǵaldy.
Sonymen qatar, 20 oramda orman daıyndaý jumystary toqtatylyp, órt qaýipsizdigi talaptaryn buza otyryp tehnıkany paıdalanýdyń 5 faktisiniń joly kesildi. Onyń ishinde ushqyn sóndirgishsiz tehnıkany paıdalaný faktileri de bar, — delingen habarlamada.
Budan bólek, 20-dan astam ákimshilik quqyq buzýshylyq anyqtaldy. Olardyń qatarynda tıisti sanattaǵy júrgizýshi kýáliginsiz kólik quraldaryn basqarý, memlekettik tirkeý nómirlerinsiz tehnıkany paıdalaný, sondaı-aq kólik quraldaryn alkogoldik masań kúıde basqarý faktileri bar.
Anyqtalǵan barlyq zań buzý boıynsha tıisti sharalar qabyldandy.
Aıta ketelik «Semeı ormany» rezervatynda jańa tehnıka satyp alýǵa 3,1 mlrd teńge qarjy bólingen edi.
