«Semeı ormanynan» 520 mln teńgeniń kóshetin urlaǵandar 5 jylǵa túrmege qamaldy
SEMEI. KAZINFORM – «Semeı ormany» rezervatynan 264 426 kóshetti urlaǵandarǵa qatysty sot úkimi shyqty.
Abaı oblysy PD uıymdasqan qylmysqa qarsy kúres basqarmasynyń qyzmetkerleri Besqaraǵaı aýdany aýmaǵynda jedel-izdestirý is-sharasy júrgizgen. Sonyń nátıjesinde «Semeı ormany» RMM Dolon fılıalynan jalpy somasy 519 861 516 teńgege baǵalanǵan 264 426 kóshettiń jasyryn urlanǵany anyqtaldy.
— Atalǵan fakti boıynsha asa iri kólemdegi urlyqqa qatysy bar oblys turǵyndaryna qatysty sotqa deıingi tergeý amaldary júrgizildi. Tergeý aıaqtalǵan soń is sotqa jiberildi, — dep habarlady departamenttiń baspasóz qyzmetinen.
Kýrchatov qalasynyń sotynda kúdiktilerdiń kinási dáleldenip, úkim shyqty. Soǵan sáıkes eki aıyptalýshy múlkin tárkileýsiz 5 jyl merzimge bas bostandyqtarynan aıyryldy.
Eske salsaq, osyǵan deıin Ertis boıy orman sharýashylyqtarynyń órtke qarsy áleýeti álsiz ekendigi jaıly jazǵanbyz.