«Semeı ormany» tabıǵı rezervatynda kadr tapshylyǵy máselesi bar — ákimdik
SEMEI. KAZINFORM — Búgin aımaq basshysy Berik Ýálıdiń tóraǵalyǵymen keńeıtilgen apparattyq jıyn ótti. Qala jáne aýdan ákimderi beıne rejımde qatysqan otyrysta órttiń qaýipti kezeńine daıyndyq máselesi qaraldy. Bul týraly Abaı oblystyq ákimdiginiń baspasóz qyzmeti málim etti.
Tótenshe jaǵdaılar departamentiniń bastyǵy Manarbek Shapaǵatovtyń aıtýynsha, sońǵy jyldary oblysta orman órti azaıǵan. Aımaqta órt qaýpin azaıtý maqsatynda óńirlik is-sharalar jospary bekitilgen. Soǵan sáıkes Semeı qalasy áýejaıy bazasyndaǵy «Qazavıaqutqarý» jáne Qorǵanys mınıstrligine qarasty úsh tikushaq kezekshilikke qoıylǵan.
Oblystaǵy eldi mekenderge jaqyn jerde 70 órt sóndirý beketi jumys isteıdi. Onda 146 adam eńbek etedi, 75 tehnıka bar. Degenmen túıtkildi máseleler de joq emes. «Semeı ormany» tabıǵı rezervatyndaǵy órt oshaqtaryn erte anyqtaıtyn júıe jańǵyrtýdy qajet etedi.
Budan bólek eski órt sóndirý tehnıkalaryn esepten shyǵaryp, jańasyn alý qajettigi týyndap otyr. Jıynda oblystaǵy órt sóndirý beketterin jabyq ǵımarattarmen jabdyqtaý máselesi de kóterildi.
Otyrysta Orman sharýashylyǵy jáne janýarlar dúnıesi ınspektsııasy basshysynyń mindetin atqarýshy Evgenıı Sýrgýtanov óńirdegi orman sharýashylyqtaryna júrgizilgen tekseris nátıjesi týraly aqparat berdi.
«Semeı ormany» tabıǵı rezervatynda 30 orman órtin sóndirý stantsııasy bar. Kópshiligi talapqa saı kelmeıdi. Jańartý qajettigi týyndap otyr. Aýa raıy jaǵdaıyna baqylaý júrgizetin meteobeket sanyn kóbeıtý máselesi de kún tártibinde tur. Órtti erte anyqtaýǵa arnalǵan baqylaý munaralarynyń keıbiri jóndeýdi qajet etedi.
«Semeı ormany» memlekettik tabıǵı rezervatynyń dırektory Dáýlet Baıbýlatovtyń aıtýynsha, qazirgi tańda 177 turaqty qyzmetker men 425 maýsymdyq jumysshydan turatyn quram jasaqtalǵan. Degenmen kadr tapshylyǵy saqtalyp otyr. Keıbir stantsııalarda tolyq quram jasaqtalmaǵan.
Jıynda ormanshylardyń jumys tıimdiligin arttyrý úshin mekemege jańa radıo stantsııalar satyp alý týraly usynys aıtyldy. Oblys ákimi óńirdegi orman sharýashylyqtarynyń materıaldyq-tehnıkalyq bazasyn nyǵaıtý mańyzdy másele ekenin atap ótti.
Aımaq basshysy osy salaǵa jaýapty orynbasary, tıisti basqarmalar men qala jáne aýdan ákimderine órt sóndirý tehnıkasyn jóndeý jáne ǵımarattarmen jabdyqtaý máselesin jergilikti kásipkerlermen memorandým túzý arqyly sheshý joldaryn qarastyrý qajettigin aıtty.
— Azamattardyń ómiri men densaýlyǵyna zııan keltiretin tótenshe jaǵdaılardyń aldyn alý — basty maqsatymyzdyń biri. Jaqynda Besqaraǵaı aýdanynda bolǵan jaǵdaıdy bilesizder. Órttiń shyǵýyna aýyl mańyndaǵy qoqys polıgonynyń janýy sebep boldy. ıAǵnı, jergilikti ákim jáne ákimdiktiń salaǵa jaýapty laýazymdy tulǵalary órtke qarsy qaýipsizdik sharalaryna nemquraıly qaraǵan. Bıyl óńirde órt erte bastaldy. Sondyqtan aldyn alý sharalaryn kúsheıtýimiz qajet, - dedi oblys ákimi.
Jıynda tapsyrmalardyń oryndalý sapasy men tıimdiligine qatysty birneshe basqarmaǵa eskertý aıtyldy. Aımaq basshysy oblys ákiminiń apparaty, basqarma basshylary, qala jáne aýdan ákimderine hattamalyq tapsyrmalardy iske asyrýdy qatań baqylaýǵa alýdy tapsyrdy.
Eske sala keteıik, buǵan deıin Abaı oblysy Besqaraǵaı aýdanyna qarasty Qoıanbaı aýyly mańynda qurǵaq shóp órtenip, oblys ákimi Berik Ýálı jedel shtab otyrysyn ótkizgen bolatyn.