«Semeı ormany» rezervatyndaǵy orman órti oqshaýlandy
ASTANA.KAZINFORM - 16 shildede bastalǵan úlken orman órti 18 shilde saǵat 9:45 te oqshaýlandy. Bul týraly Ekologııa jáne tabıǵı resýrstar mınıstrligi habarlady.
Órtti sóndirý jumystaryna Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetine qarasty «Semeı ormany» jáne «Ertis ormany» memlekettik orman tabıǵı rezervatynyń qyzmetkerleri, «Qazavıaormanqorǵaý» RMQK, sondaı-aq Tótenshe jaǵdaılar, Іshki ister, Qorǵanys mınıstrlikteriniń, Ulttyq qaýipsizdik komıtetiniń jáne jergilikti atqarýshy organdardyń kúshteri jumyldyryldy.
Jalpy órtti sóndirýge 769 adam, 191 birlik jerústi tehnıkasy jáne 8 tikushaq tartyldy.
Órtti sóndirý bastalǵannan beri avıatsııa arqyly 319 ret sý tógilip, órt oshaǵyna 709 tonna sý jetkizildi.
Qazaqstan Premer-Mınıstri Oljas Bektenovtiń tapsyrmasymen Ekologııa jáne tabıǵı resýrstar mınıstri Erlan Nysanbaev pen Tótenshe jaǵdaılar mınıstri Shyńǵys Árinov Abaı oblysyna kelip, Abaı oblysy ákimi Berik Ýálımen birge jumyldyrylǵan kúshter men quraldardyń jumysyn úılestirdi.
Sondaı-aq Ekologııa jáne tabıǵı resýrstar mınıstri Erlan Nysanbaev pen oblys ákimi Berik Ýálı órt aýmaǵyn tikushaqpen áýeden baqylap, júrgizilip jatqan jumystarmen tanysty.
Qazirgi ýaqytta órtti tolyq sóndirý jáne órt oshaǵyn baqylaý jumystary jalǵasyp jatyr.
Aıta keteıik, «Semeı ormany» rezervatynda órt shyqqan soń lagerdegi 200-ge jýyq bala evakýatsııalandy.
«Semeı ormany» rezervatynda bir kúnde úsh orman órti tirkeldi.
