«Semeı ormany» rezervatynda jańa tehnıka satyp alýǵa 3,1 mlrd teńge qarjy bólindi
ASTANA. KAZINFORM – Ekologııa jáne tabıǵı resýrstar mınıstrliginiń qoldaýymen «Jasyl damý» AQ kádege jaratý tólemderi esebinen Abaı oblysyndaǵy «Semeı ormany» memlekettik orman tabıǵı rezervatyna zamanaýı arnaıy tehnıka satyp alýǵa 3,1 mlrd teńgeden astam qarajat baǵyttady.
Rezervattyń materıaldyq-tehnıkalyq bazasyn jańartý órt qaýipti maýsymǵa daıyndyqty kúsheıtýge, órt oshaqtaryna jedel den qoıý ýaqytyn qysqartýǵa jáne orman qoryn qorǵaý tıimdiligin arttyrýǵa múmkindik beredi.
Joba aıasynda memlekettik orman tabıǵı rezervatyna órt oshaqtaryna jedel den qoıý jáne órtke qarsy is-sharalardy tıimdi júrgizýge qajetti 39 órt sóndirý avtotsısternasy, 10 traktor jáne 26 jol talǵamaıtyn kólik satyp alyndy.
Búginde barlyq tehnıka paıdalanýǵa berilip, kúndelikti jumysta qoldanylyp jatyr. Sonyń arqasynda mamandar orman órtterine jedel den qoıyp, qajetti tehnıka men jabdyqtardy órt oshaqtaryna der kezinde jetkizip, orman aýmaqtaryn qorǵaý jumystaryn tıimdi atqaryp jatyr.
Eske salaıyq, 2024 jyldan búgingi kúnge deıin «Jasyl damý» AQ kádege jaratý tólemderi esebinen memlekettik ulttyq tabıǵı parkterge, memlekettik orman tabıǵı rezervattaryna, qoryqtarǵa jáne orman sharýashylyǵy mekemelerine zamanaýı arnaıy tehnıka satyp alýǵa 33,1 mlrd teńgeden astam qarajat baǵyttady.
Ekologııa jáne tabıǵı resýrstar mınıstrligi málimetinshe, osy kezeńde tabıǵat qorǵaý uıymdary úshin orman jáne dala órtteriniń aldyn alýǵa jáne olardy jedel sóndirýge arnalǵan 1 006 birlik arnaıy tehnıka satyp alyndy. Olardyń qatarynda órt sóndirý avtotsısternalary, jol talǵamaıtyn kólikter, traktorlar jáne orman qory men erekshe qorǵalatyn tabıǵı aýmaqtardy qorǵaýǵa qajetti basqa da arnaıy tehnıka bar.
Mundaı jobalardy júzege asyrý tabıǵat qorǵaý mekemeleriniń materıaldyq-tehnıkalyq bazasyn nyǵaıtýǵa, olardyń órt qaýipti maýsymǵa daıyndyǵyn arttyrýǵa jáne Qazaqstannyń biregeı orman ekojúıelerin saqtaýǵa yqpal etedi.
Osydan úsh jyl buryn Semeı ormanyndaǵy alapat órt 60 myń gektardan astam jerdi kúlge aınaldyryp, 14 ormanshynyń ómirin qıǵan edi. El tarıhyndaǵy eń iri orman órtiniń birinen keıin óńirde tabıǵatty qalpyna keltirý jumystary qarqyn aldy. Semeı ormanynyń búgingi tynysy men ormanshylardyń jankeshti eńbegi týraly Jibek Joly telearnasynyń «Ekoaýdıt» baǵdarlamasy arnaıy shyǵarylym ázirledi.
