«Semeı ormany» rezervatynda órt shyqqan soń lagerdegi 200-ge jýyq bala evakýatsııalandy
SEMEI. KAZINFORM – Abaı oblysyndaǵy «Semeı ormany» memlekettik orman tabıǵı rezervatynyń aýmaǵynda órt shyqqan soń qaýipsizdik maqsatynda mańaıdaǵy balalar lagerinen tárbıelenýshiler evakýatsııalandy.
Oblystyq TJD baspasóz qyzmetiniń málimetinshe, órt 16 shilde kúni tańerteń rezervattyń Borodýlıha fılıalyna qarasty Kamyshenka ormanshylyǵynda shyqqan bolatyn. Tilsiz jaýdy aýyzdyqtaýǵa memlekettik orman kúzetiniń qyzmetkerleri, tótenshe jaǵdaılar departamentiniń bólimsheleri, arnaıy tehnıka men avıatsııa jumyldyrylǵan.
Oqıǵa ornynda 30 qutqarýshy, ormanshylar, avtotsısternalar, traktorlar jáne shaǵyn orman órtin sóndirý kesheni jumys istep jatyr. Qaýipsizdik maqsatynda mektep janyndaǵy lagerde demalyp jatqan 190 bala qaýipsiz jerge kóshirildi.
- Qazirgi ýaqytta orman órtin oqshaýlaý jáne tolyq sóndirý jumystary jalǵasyp jatyr. Jaǵdaı baqylaýda, - dep málimdedi «Semeı ormany» memlekettik orman tabıǵı rezervatynyń ókilderi.
Mamandardyń aıtýynsha, órtti sóndirý jumystaryna aýa temperatýrasynyń +34 gradýsqa deıin kóterilýi jáne órt qaýpiniń V (eń joǵary) klasynyń saqtalýy qıyndyq týǵyzyp otyr. Soltústik-batystan soqqan jeldiń jyldamdyǵy sekýndyna 4 metr, ekpini 8 metrge deıin jetedi.
Eske salsaq, osyǵan deıin Semeı ormanyndaǵy órtti aýyzdyqtaýǵa tikushaqtar men qosymsha kúshter jumyldyrylǵany habarlanǵan.
