«Semeı ormany» rezervatyna órtti erte anyqtaý júıesi engiziledi
ASTANA. KAZINFORM — Ol orman órtterine jedel den qoıýǵa, yqtımal táýekelderdi baǵalaýǵa jáne órtti erte kezeńderde oqshaýlaýǵa múmkindik beredi, dep habarlaıdy Orman sharýashylyǵy jáne janýarlar dúnıesi komıteti.
Búgin «Semeı ormany» rezervatynyń Borodýlıha fılıalynyń Kamyshen ormanshylyǵynda Qazaqstan Respýblıkasynyń Ekologııa jáne tabıǵı resýrstar mınıstri E.Nysanbaev pen «Qazaqtelekom» AQ Basqarma tóraǵasy B. Mýsınniń qatysýymen órtti erte anyqtaý júıesiniń avtomattandyrylǵan monıtorıng júıesin ornatý oryndary ashyldy.
«Semeı ormany» rezervatynyń aýmaǵynda erte anyqtaý júıesi iske qosyldy. Ol orman órtterine jedel den qoıýǵa, yqtımal táýekelderdi baǵalaýǵa jáne órtti erte kezeńderde oqshaýlaýǵa múmkindik beredi.
«Semeı ormany» rezervaty elimizdiń orman órtine beıim óńirleriniń biri. Aǵymdaǵy jyldyń basynan bastap 42 órt oshaǵy tirkeldi, olardyń edáýir bóligi tabıǵı faktorlardan, sonyń ishinde qurǵaq naızaǵaı razrıadtarynan týyndady.
Sonymen qatar, ınvestorlarmen kezdesýde JTQ ázirleý kólemin ulǵaıtý boıynsha naqty nusqaýlar berildi. Mınıstr týyndaǵan máselelerdi jedel sheshýdiń mańyzdylyǵyn atap ótip, jaǵdaıdy turaqtandyrý jáne kólemderdi ýaqtyly ıgerý úshin maýsym aıynyń sońyna deıin merzim belgiledi.
— Engizilgen júıe qazirgi zamanǵy termovızııalyq jáne optıkalyq kameralardy paıdalana otyryp, orman alqaptarynyń táýlik boıy beınemonıtorıngine arnalǵan. Kameralar bıiktigi 30 metr antenna-dińgek qurylystaryna ornalastyrylady, 360 gradýsqa aınalady jáne jasandy ıntellekt kómegimen tútin nemese ot belgileri avtomatty túrde erte kezeńderde tanylady. Órt belgileri anyqtalǵan kezde júıe jedel basqarý ortalyǵyna sıgnaldy birden jiberedi, bul órt oshaǵyn tez oqshaýlaýǵa jáne joıýǵa múmkindik beredi. Bolashaqta júıe QR TJM Strategııalyq josparlaý jáne jedel basqarý komandalyq ortalyǵyna qosylady, bul tıimdi basqarý sheshimderin qabyldaý úshin respýblıkalyq deńgeıde orman alqaptarynyń ortalyqtandyrylǵan monıtorıngin qamtamasyz etedi. Osylaısha, «Semeı ormany» jobasy — tabıǵatty saqtaýǵa jáne orman alqaptary mańynda turatyn adamdardyń qaýipsizdigin qamtamasyz etýge baǵyttalǵan sheshim, - delingen komıtet habarlamasynda.
Buǵan deıin Qazaqstanda orman órtin erte anyqtaý avtomattandyrylǵan júıesi engizilip jatqany aıtylǵan edi.