«Semeı ormany» rezervatyna bıyl 29 mln-ǵa jýyq kóshet otyrǵyzylady
SEMEI. KAZINFORM – Abaı oblysyndaǵy «Semeı ormany» rezervatyna osy jyly 29 mln-ǵa jýyq kóshet otyrǵyzylady.
Oblys turǵyndary «Taza Qazaqstan» respýblıkalyq aktsııasy aıasynda Besqaraǵaı aýdanynyń Jylandy aýylynyń mańynda kóshet otyrǵyzdy. 12 gektar jerge 57 120 túp kóshet egildi.
Bul jumystarǵa qaraǵaıly ormandy qalpyna keltirýge úles qosqysy keletin jastar, máslıhat depýtattary, eriktiler, BAQ ókilderi men sportshylar óz septikterin tıgizdi. Aktsııaǵa kezekti márte qatysqan oblys ákimi Nurlan Uranhaev osy bastamanyń maqsaty óńirdiń bıoalýantúrliligi men ekojúıesin qorǵaýda sheshýshi ról atqaratyn ormandy saqtaý ekenin atap ótti.
«Bul aktsııa birrettik shara emes. Aldaǵy ýaqytta da jalǵasady. Semeı qalasynda «Elimaı» FK, klýb tárbıelenýshileri, «Semeı» fýtzal komandasynyń oıynshylary kóshet otyrǵyzyp, aktsııaǵa óz úlesterin qosýda. Tazalyq jumystaryna bárimiz bir kisideı atsalysyp, aımaqty kórkeıtý arqyly óskeleń urpaqqa úlgi bola alamyz», - dedi ol.
Bıyl «Semeı ormany» rezervaty aýmaǵyndaǵy 6100 gektar jerge 28 mln 700 myń kóshet otyrǵyzý josparlanǵan. Bul jumys eki kezeńdi qamtıdy. Máselen, kóktemde 5 myń gektardan astam, al qalǵan 961 gektarǵa kúzde qaraǵaıdyń jas óskinderin egý mindeti tur.
Aıta keteıik, aktsııa bastalǵaly beri oblysta 12 myńǵa jýyq aýla retke keltirilip, turmystyq qatty qaldyqtar polıgonyna 13 myń tonnadan astam qaldyq shyǵaryldy. 80 myń aǵash, 22 myń buta otyrǵyzylyp, 218 saıabaq pen 85 tarıhı-mádenı eskertkish abattandyryldy.
