«Semeı ormany» rezervatyn tanymdyq týrızm retinde qarastyrýǵa bolady — Berik Ýálı

ASTANA. KAZINFORM — Prezıdent tapsyrmasyna sáıkes Abaı oblysynda týrızm basqarmasy quryldy. Atalǵan salanyń aldaǵy ýaqyttaǵy áleýeti týraly óńir basshysy Berik Ýálı aıtyp berdi. 

— Týrızm áleýetin iske asyrý úshin týrıstik marshrýttar boıynsha jol ınfraqurylymyn jetildirý jáne jol boıyndaǵy servısti damytý jóninde sharalar qabyldanyp jatyr. Óńirde tanymdyq, ǵylymı jáne etnıkalyq, iskerlik, sporttyq, mádenı-oqıǵalyq týrızmniń negizi retinde qarastyrýǵa bolatyn baı tarıhı-mádenı mura bar, — dedi Berik Ýálı ortalyq kommýnıkatsııalar qyzmeti alańynda óńirdiń 9 aı ishindegi áleýmettik-ekonomıkalyq damýy týraly esep bere turyp.

Óńirdegi týrıstik, mádenı-tarıhı nysandar: 
— «Jıdebaı-Bórili» Abaı mýzeıi;
— Semeıde «Alash Arystary» mýzeı úıi;
— Nevzorovtar otbasy atyndaǵy oblystyq beıneleý óneri mýzeıi;
— F. M. Dostoevskıı atyndaǵy ádebı-memorıaldyq mýzeı úıi;
— Abaı memlekettik tarıhı-mádenı mýzeıi;
— Alakól jaǵajaıy;
— Besqaraǵaı aýdanynyń soltústik-batys bóligindegi Shıpaly kól;
— Aıagóz ózeniniń oń jaǵalaýynda «Qozy-Kórpesh jáne Baıan-Sulý» mazary;
— Shúlbi sý qoımasy;
— Abaı aýdanyndaǵy Qońyr áýlıe úńgiri;
— Aqsýat aýdanyndaǵy Yrǵyzbaı ata kesenesi;
— «Semeı — Qaraýyl» tas jolynda ańyzǵa aınalǵan ǵashyqtar juby «Eńlik-Kebek» kesenesi.

— Sonymen qatar «Semeı ormany» memlekettik orman tabıǵı rezervatyn tanymdyq týrızm retinde qarastyrýǵa bolady. Respýblıkalyq jáne halyqaralyq deńgeıdegi iskerlik, mádenı, sporttyq jáne basqa da keń aýqymdy is-sharalardy ótkizý qonaqúı qyzmetine suranysty arttyrady. Tıisinshe zamanaýı elıtalyq qonaqúı keshenderiniń qurylysyna serpin beredi. Prezıdenttiń tapsyrmasyna sáıkes oblysta týrıstik ınfraqurylymdy damytýǵa baǵyttalǵan aýqymdy jobalardy júzege asyrý jalǵasady, — dep qorytyndylady Berik Ýálı.

Aıta ketsek, Abaı oblysynda 358,8 shaqyrym jergilikti jol jóndeýden ótip jatyr. 

Sonymen qatar oblys ákimi Alakóldiń týrıstik jáne ınvestıtsııalyq áleýetine qatysty túsinik berdi.