Semeı ormanyndaǵy órtke qatysty búkil qylmystyq istiń sońǵy núktesi qoıyldy
ASTANA. KAZINFORM — Qazaqstan Respýblıkasynyń Bas prokýratýrasy «Semeı ormany» MOTR» RMM (budan ári – Rezervat) órttiń sóndirýin qamtamasyz etpegen ýákiletti memlekettik organdardyń laýazymdy tulǵalaryna qatysty sotqa deıingi tergep-tekserýdi aıaqtady.
Osylaısha, Rezervattyń Bas dırektorynyń mindetin atqarýshy men Novoshýlbınsk fılıalynyń dırektoryna qatysty qylmystyq is sotqa jiberildi. Onyń sheshimimen fıgýranttar 2024 jylǵy mamyrda abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzǵany úshin kináli dep tanylyp (QK-niń 292-baby 3-bóligi), árqaısysyna 7 jylǵa bas bostandyǵynan aıyrý jazasy taǵaıyndaldy.
2024 jylǵy tamyzda Abaı oblystyq apellıatsııalyq soty úkimdi ózgerissiz, sondaı-aq sottalǵandardyń, advokattardyń jáne qorǵaýshylardyń shaǵymdaryn qanaǵattandyrýsyz qaldyrdy.
2024 jylǵy qazanda kelesi qylmystyq is boıynsha Semeı qalasynyń №2 soty Rezervattyń aqparattyq tehnologııalar jáne baılanys bóliminiń bastyǵyn abaısyzda aýyr zardaptarǵa ákep soqqan salǵyrttyq faktisi (QK-niń 371-baby 2-bóligi) boıynsha memlekettik qyzmette jáne jergilikti ózin-ózi basqarý organdarynda 3 jyl merzimge laýazymdy atqarý quqyǵynan aıyra otyryp, 2 jylǵa bas bostandyǵynan aıyrýǵa úkim etti.
Sondaı-aq byltyrǵy jylǵy qazanda Borodýlıha aýdandyq sotynyń sheshimimen «Qazaq ormandardy avıatsııalyq qorǵaý jáne orman sharýashylyǵyna qyzmet kórsetý bazasy» RMQK bas dırektorynyń mindetin atqarýshysyna qatysty sheshim shyǵardy. Sonymen qatar memlekettik qyzmette jáne jergilikti ózin-ózi basqarý organdarynda 2 jyl merzimge laýazymdy atqarý quqyǵynan aıyra otyryp, QK-niń 371-baby 2-bóligimen 2 jylǵa bas bostandyǵynan aıyrýǵa úkim etti.
Osylaısha, barlyq kináli jazanyń ártúrli merzimderine sottaldy.
Odan bólek Qazaqstan Respýblıkasy Bas prokýratýrasynyń usynýy boıynsha Ekologııa jáne tabıǵı resýrstar mınıstrliginiń, Tótenshe jaǵdaılar mınıstrliginiń 10 qyzmetkeri de túrli tártiptik jaýapkershilikke tartyldy.
Qadaǵalaý vedomstvosy orman jáne qorshaǵan ortany qorǵaý uıymdarynyń qyzmetkerlerin áleýmettik qorǵaý deńgeıin arttyrýǵa baǵyttalǵan birqatar normatıvtik-quqyqtyq aktige ózgerister engizdi.
Eske sala keteıik, buǵan deıin Semeı ormanyndaǵy órtenip ketken aǵashtar satylyp jatqanyn habarlaǵan edik. Sondaı-aq Semeı ormanyndaǵy alapat órtten qaza bolǵan órt sóndirýshiler men ormanshylarǵa eskertkish ashyldy.
Aıta keteıik, byltyr «Semeı ormanynda» órt shyǵyp, 15 adamnyń ómirin jalmaǵan bolatyn. Osydan keıin 12 maýsym elimizde jalpyulttyq aza tutý kúni bolyp jarııalanǵan.