«Semeı ormany» aýmaǵynda zańsyz ken óndirýden kelgen shyǵyn 228 mln teńgeden asty
ASTANA. KAZINFORM — Abaı oblysynda memlekettik orman qory aýmaǵynda paıdaly qazbalardy zańsyz óndirý faktisi toqtatyldy, dep habarlaıdy oblystyq prokýratýranyń baspasóz qyzmeti.
Abaı oblysynyń Mamandandyrylǵan tabıǵat qorǵaý prokýratýrasy erekshe qorǵalatyn tabıǵı aýmaqtarǵa jatatyn «Semeı ormany» MOTR MM-niń Taý-Dala fılıalyna qarasty Úlken-Bóken ormanshylyǵy aýmaǵynda paıdaly qazbalardy zańsyz óndirý faktisin anyqtady.
— Zańsyz qyzmettiń saldarynan topyraqtyń qunarly qabaty men jasyl jelekter joıylyp, orman qorynyń jerleri búlingen. Ormanshylyqtyń málimetine sáıkes, keltirilgen zalal mólsheri 228 mln teńgeden asty. Osyǵan baılanysty Mamandandyrylǵan tabıǵat qorǵaý prokýratýrasy QR Qylmystyq kodeksiniń 334-baby 3-bóligi 3) tarmaǵy boıynsha (jer qoınaýyn óz betinshe paıdalaný) sotqa deıingi tergep-tekserýdi bastady, — delingen habarlamada.
Oblystyq prokýratýra jer qoınaýyn zańsyz paıdalaný, sondaı-aq erekshe qorǵalatyn tabıǵı aýmaqtarda sharýashylyq qyzmetti júzege asyrý zańda belgilengen jaýaptylyqqa, onyń ishinde qylmystyq jaýaptylyqqa ákep soǵatynyn eskertedi. Ekologııalyq zańnamany buzýshylyqtardy anyqtaý jáne jolyn kesý boıynsha qadaǵalaý sharalary jalǵasatyn bolady, al qorshaǵan ortaǵa zııan keltirýdiń árbir faktisine keltirilgen zalaldyń tolyq kólemde ótelýin qamtamasyz ete otyryp, qaǵıdatty quqyqtyq baǵa beriledi.
Osyǵan deıin Kentaý qalasynyń mańynda «barıt» kenin ruqsatsyz qazǵan eki jergilikti turǵyn men shetel azamaty jaýapqa tartylǵany belgili boldy.
