Semeı óńirindegi orman órtin sóndirýge tikushaqtar jumyldyryldy
ASTANA. KAZINFORM —5 tamyzda saǵat 16:05-te «Ertis ormany» memlekettik orman tabıǵı rezervatynyń Besqaraǵaı fılıalyna qarasty Kókjal ormanshylyǵynda joǵary orman órti tirkeldi.
Qaraǵaıly orman alqabynda oryn alǵan órtti sóndirýge orman mekemesiniń 20 qyzmetkeri men 2 tehnıka, sondaı-aq RMQK «Qazavıaormanqorǵaý» kásipornynyń 2 áýe órt sóndirý desantshysy jáne sý tógý qurylǵysymen (VSÝ) jabdyqtalǵan tikushaǵy jumyldyryldy.
Qosymsha kúsh retinde oqıǵa ornyna orman mekemesiniń 20 qyzmetkeri men 6 órt sóndirý avtotsısternasy, Pavlodar qalasynan sý tógý qurylǵysymen jabdyqtalǵan «Qazavıaormanqorǵaý» RMQK Mı-8 tikushaǵy jumyldyrylýda.
Jaǵdaı Qazaqstan Respýblıkasy Ekologııa jáne tabıǵı resýrstar mınıstrliginiń turaqty baqylaýynda.
Aıta ketelik orman órtiniń aldyn alýǵa 33 mlrd teńgeden astam qarjy jumsalǵany týraly jazǵan edik.
