Semeı men Óskemende JEO kim salatyny jaqynda belgili bolady

ASTANA. KAZINFORM – Úsh qalada salynýy tıis jylý elektr ortalyǵynyń qurylysy týraly Energetıka vıtse-mınıstri Suńǵat Esimhanov málimet berdi.

- Basynda úsh jylý elektr ortalyǵyn Reseı tarapymen birlesip salamyz degen úkimetaralyq kelisim boldy. Biraq, úsh jylý elektr ortalyǵy da «Samuryq-Energo» AQ menshiginde bolady, Reseı tek qarjylandyrady, ıaǵnı merdiger bolady dep kelisilgen. Qarjylandyrý máselesi sheshilmeýine baılanysty Úkimettiń sheshimimen Kókshetaýdaǵy jyl ortalyǵyn «Samuryq-Energo» kompanııasy óz salyp bastady, - dep jaýap berdi Suńǵat Esimhanov Úkimet úıinde ótken baspasóz máslıhatynda. 

Vıtse-mınıstrdiń málimdeýinshe, jylý elektr ortalyǵy Qytaı tehnologııasynyń negizinde salynyp jatyr.

- Qalǵan eki JEO boıynsha jaqyn arada sheshim qabyldanady, - dep qysqa qaıyrdy. 

Sondaı-aq mınıstrdiń orynbasary JEO salýǵa Reseıdiń qatysy bolmaıtynyn tilge tıek etti. 

Eske salsaq, byltyr sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy.

Keıin elimizdiń úsh qalasynda salynatyn jylý elektr ortalyqtary «Samuryq-Energo» kompanııasynyń teńgeriminde bolatyny belgili boldy. 

Energetıka mınıstrliginiń aqparaty boıynsha Kókshetaýdaǵy jylý ortalyǵy 2029 jyly, Óskemendegi ortalyq 2031 jyly, al Semeıdegi ortalyq 2032 jyly tolyq paıdalanýǵa beriledi.