Semeı medıtsına ýnıversıtetiniń túlegi álemdik konkýrs júldegeri atandy
SEMEI. QazAqparat – Semeılik Raýan Baǵdanuly Búkilálemdik Qozǵalys buzylysy qaýymdastyǵy kongresiniń beınejarys saıysyna qatysyp júldeger atandy. Osyǵan deıin bul saıysta TMD elderinen 2 adam ǵana irikteýden ótken. Alǵash reseılik ǵalym qatyssa, endi mine Qazaqstan namysyn qorǵaǵan Raýan júldeger atanyp otyr, dep habarlaıdy QazAqparat tilshisi.
Búkilálemdik Qozǵalys buzylysy qaýymdastyǵy – bul Parkınson aýrýy men adamnyń ózge de qımyl-qozǵalysynyń buzylysyna alyp keletin aýrýlardy zertteýge baǵyttalǵan medıtsına salasyndaǵy ǵalymdar men dárigerlerdiń álemdik qaýymdastyǵy. Osy qaýymdastyq ózderiniń bıylǵy 24-shi Kongresin AQSh-tyń Fıladelfııa qalasynda COVID-19 pandemııasyna baılanysty vırtýaldy formatta ótkizdi. Oǵan 146 elden 20 myń ǵalym men dárigerler qatysty.
Jalpy kongresterdiń basty maqsaty - bilim berý jáne álemniń bilikti mamandarynan tájirıbe jınap úırený. Sondyqtan osy kongrestiń bir bólimi - dıagnoz qoıýǵa qıyn soǵatyn óte sırek nemese klınıkalyq turǵydan óte ózekti jaǵdaılardy kórsetetin vıdeosaıys. Al saıystyń ózi kongress sheńberinde 13-shi ret ótkizilip otyr. Saıysqa qatysýǵa álemniń túkpir-túkpirinen nıet bildirgender kóp boldy. Alaıda onyń ishinen eń ózekti jáne kongress qatysýshylaryna sapaly jáne naqty praktıkalyq tájirıbe beredi degen 12 klınıkalyq mysal ǵana iriktelip alynyp, kongress saıysyna qatysý quqyǵyn alady. Saıysqa qatysýshy ǵalymdardyń eńbegin álemniń eń bilikti nevrolog dárigerleri baǵalasa, bulardan ózge táýelsiz eki bilikti dáriger maman klınıkalyq materıaldy talqylady.
Mine, osy tańdalyp alynǵan 12 úmitkerdiń arasynan Raýan Baǵdanuly dıagnoz qoıýy óte qıynǵa soǵatyn, biraq genetıkalyq analız jasaı otyryp molekýlalyq dıagnoz qoıǵan klınıkalyq mysaldy keltirip saıystyń qola medalin jeńip aldy. Júldegerlerdi anyqtaý kongreske qatysqan álem ǵalymdarynyń onlaın daýys berýi arqyly júrgizilgen.
Raýan Qaıyrjanov – Semeı memlekettik medıtsına akademııasynyń emdeý isi fakýltetiniń túlegi. Atalǵan oqý ornyn 2007 jyly támamdap, 2008 jyldan beri nevrologııa salasynda qyzmet atqaryp keledi. 2014-2016 jyldar aralyǵynda London ýnıversıtetiniń Nevrologııa ǵylymı-zertteý ınstıtýtynda klınıkalyq nevrologııa mamandyǵy boıynsha ǵylymı magıstratýrada oqyǵan.
Qazirgi tańda ol London ýnıversıtetiniń Nevrologııa ǵylymı-zertteý ınstıtýtynyń stıpendııasyn utyp alyp, nevrologııa jáne neırogenetıka salasy boıynsha doktorontýrada oqyp júr.
«Meniń ǵylymı jumysym - Orta Azııa elderi men Qazaqstandaǵy nerv júıesiniń tuqym qýalaıtyn aýrýlaryn zertteý arqyly genetıkalyq sebebin tabý. Uaq jyldar boıy alǵan bilimimdi álemde áli ashylmaǵan tek Orta Azııa men Qazaqstan halyqtaryna ǵana tán jańa aýrý shaqyratyn genderdi taýyp, ol aýrýlardy genetıkalyq tásildermen emdeý joldaryn ashýǵa arnap júrmin. Qazirde Orta Azııa jáne Qazaqstannan nerv júıesiniń tuqym qýalaıtyn aýrýlardy shaqyratyn birqatar jańa gender ashtyq. Maqsatym – elime, adamzatqa paıdamdy tıgizý», - deıdi Raýan Baǵdanuly.
Ol Qazaqstan men Orta Azııa elderindegi klınıkalyq dıagnoz qoıýǵa qıyn nerv júıesiniń tuqym qýalaıtyn aýrýlary bar adamdarǵa qymbatqa túsip, qoldary jete bermeıtin genetıkalyq analızderdi tegin jasap júr.
Aıta keteıik, álemdik saıystyń qorytyndysy shyǵysymen odan habardar bolǵan ýkraınalyq dáriger ǵalym Raýandy jeńisimen quttyqtap, óz emdelýshisiniń emi tabylmaı otyrǵan dertine dál osyndaı analızdi júrgizip kómektesýin surapty.
