Semeı mashına jasaý zaýyty dırektorynyń kabınetine qatysty túsinik berildi

ASTANA. QazAqparat – QR Sybaılas jemqorlyqqa qarsy is-qımyl agenttigi Semeı mashına jasaý zaýyty basshysynyń kabınetine qatysty vıdeoǵa túsinik berdi, dep habarlaıdy QazAqparat.

«Bıylǵy 19 qazanda buqaralyq aqparat quraldarynda «Semeı mashına jasaý zaýyty» AQ dırektorynyń kabınetiniń vıdeojazbasy jarııalandy.

Beınejazbany «Qazaqstan ınjınırıng» Ulttyq kompanııasy» AQ basshysy T.K. Ábdirahmanov túsirgen.

Semeı mashına jasaý zaýyty «Qazaqstan ınjınırıng «Ulttyq kompanııasy» AQ-nyń qaramaǵyndaǵy zaýyt bolyp tabylady.

«Qazaqstan ınjınırıng» Ulttyq kompanııasy usynǵan aqparatqa sáıkes, kásiporynnyń 2015 jyldan beri jınaqtalǵan shyǵyny shamamen 1,9 mlrd teńgeni quraıdy, al kredıtorlyq bereshektiń ósýi 3 mlrd teńgeden asty.

Osy jyldyń aqpan aıynan bastap zaýytqa qatysty sot sheshimimen 5 jyl merzimge ońaltý rásimi qoldanyldy.

Kredıtorlar komıtetiniń sheshimi boıynsha bıylǵy 25 qazannan bastap zaýytta aýdıt bastalady.

Qazirgi ýaqytta osy faktiler boıynsha Sybaılas jemqorlyqqa qarsy qyzmetke eshqandaı materıaldar men ótinishter túsken joq», - delingen málimette.

Bul rette, atap ótilgendeı, ońaltý jáne bankrottyq kezindegi zańsyz árekettermen, sondaı-aq qasaqana bankrottyqpen baılanysty qylmystyq quqyq buzýshylyqtarmen Ekonomıkalyq tergeý qyzmeti aınalysady.

Eske salaıyq, keshe áleýmettik jelilerde Semeı mashına jasaý zaýyty basshysynyń kabınetinen túsirilgen vıdeo taraǵan bolatyn.

Foto: orda.kz