Semeı mańyndaǵy orman órti aýyzdyqtaldy
SEMEI. QazAqparat - Keshki saǵat 21:00-de Semeı mańynda janyp jatqan orman órti aýyzdyqtaldy. Bul týraly QR ІІM TJK baspasóz qyzmeti habarlady.
«Semeı ormany» tabıǵı rezervatynyń bólimshe basshysy málim etkendeı, órttiń jalpy aýmaǵy 100 gektardy quraıdy.
«Órt shyqqan jerde jedel shtab jumys istep jatyr. Dál qazirgi jaǵdaı boıynsha jekelegen oshaqtar janyp jatyr. Ony orman sharýashylyǵynyń qyzmetkerleri aspaly órt sóndirgishpen jáne shartyldaqpen sóndirýde. Órttiń sharpý qaýpi joq», - delingen QR ІІM TJK habarlamasynda.
Órt shyqqan jerge 8 órt sóndirý tehnıkasy jáne oblystyq órt sóndirý qyzmetiniń 79 adamy, «Semeı ormany» tabıǵı rezervatynyń 234 qyzmetkeri jáne 50 tehnıka, sonyń ishinde 25 avtotsısterna jumyldyryldy.
Órttiń aldyn ala shyǵý sebebi - turǵyndardyń otty abaısyz qoldanýy.
Eske sala ketsek, buǵan deıin «Semeı ormany» tabıǵı rezervaty aýmaǵyndaǵy qaraǵaı ormany órtenip jatqanyn habarlaǵan bolatynbyz.
