Semeı kóshelerinen nóserden keıin 3600 tekshe metr sý soryldy
SEMEI. QazAqparat - Semeıde qatty daýyl men nóserden keıingi qalypqa keltirý jumystary jalǵasýda, dep habarlaıdy QazAqparat.
Eske sala keteıik, 13 maýsym kúni saǵat 17.30 shamasynda qalada aýa-raıy qubylyp, daýyldyń sońy jańbyr aralas burshaqqa aınaldy. Kóshe joldary men aýlalardy sý basyp, kólik qozǵalysy qıyndady.
Qazir sý basqan Muhtar Áýezov, Keshirim Boztaev, Árip Táńirbergenov, Glınkı, Narodnyı kóshesindei sýdy tartý jumystary aıaqtalǵan. Tek Selevın kóshesinde jumystar jalǵasyp jatyr. Jarty saǵat ishinde bir aılyq normaǵa jýyqtaǵan jańbyrdyń mólsherinen munda arnaıy ornatylǵan sorǵylar isten shyqqan. Saldarynan jınalǵan sýdyń deńgeıi 2 metrge jetken.
Túni boıy bul jerde 400 kýb (tekshe) metr sý aıdaıtyn órt sorǵy stansasynyń (PNS) kóligi, 300 tekshe metr motopompa, 10-ǵa jýyq usaq motopompa men arnaıy kólikter jumyldyryldy. Qazir isten shyqqan sorǵylardy jóndeý jumystarymen kommýnaldyq qyzmettiń 12 qyzmetkeri men 4 tehnıkasy aınalysýda. Jalpy qala boıynsha nóserden keıin 3600 tekshe metr sý soryldy.
«Sý birneshe kóshe men aınalma joldardy basyp qaldy. Abyroı bolǵanda, jeke sektordaǵy úılerge kirgen joq. Zardap shekken turǵyndar da joq. Qazir sý basqan kóshelerdegi sýdy aıdaý jumystary aıaqtaldy. Tek Selevın kóshesinde jumystar jalǵasyp jatyr»,-dedi Semeı qalalyq TJB azamattyq qorǵanys bóliminiń basshysy Qymbat Kópbaev.
