Semeı kóshelerinde qazaq tilindegi jarnamalardan 70-ten astam qate tabyldy
«Til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy boıynsha Semeıde is-sharalar jospary bekitilgen. Nátıjesinde tilderdi oqytý ortalyqtarynda byltyr 719 adam qazaq tilin tegin úırendi. Arnaıy júrgizilgen saýalnama qorytyndysy boıynsha shaharda memlekettik tildi meńgergen turǵyndardyń úlesi – 98% qurap otyr», - delingen qalalyq Aqparat ortalyǵy taratqan málimette.
Memleket basshysy Qasym-Jomart Toqaevtyń «Memlekettik tildi ultaralyq qatynas tiline aınaldyrý» ıdeıasyn júzege asyrý maqsatynda «Til qorǵandary» eriktiler toby qurylǵan. Bul top túrli salalarda qazaq tilin qoldaný kezinde jiberilgen qatelikterdi anyqtaýmen aınalysady.
«Ótkizilgen monıtorıngiler barysynda 302 obekt qamtyldy. Shara aıasynda zańnama talaptary túsindirilip, Semeı qalasynyń tilderdi oqytý ortalyǵymen ázirlengen sózdikter taratyldy. Kóshelerdegi kórneki jarnamalardan 74 qate anyqtaldy. Búginde 48 obekti olqylyqtyń ornyn toltyrdy», - dedi qalalyq Mádenıet jáne tilderdi damytý bóliminiń basshysy Nazerke Aqqojına.
