Semeı kósheleri men saıabaqtaryna 30 myń kóshet otyrǵyzylady
SEMEI. QazAqparat - Semeıde 1 sáýir men 31 mamyr aralyǵynda sanıtarlyq-tazalyq aılyǵy ótedi. Bul týraly QazAqparat tilshisi Semeı aqparattyq ortalyǵyna silteme jasap habarlaıdy.
Qala əkimi Ermak Sálimov tazalyq jumystaryna turǵyndardy, memlekettik mekemeler, kásiporyndar, dúkender, meıramhanalar, shaǵyn jáne orta bıznes ókilderin qatysýǵa shaqyrdy. Alǵashqy senbilik 6 sáýir kúni ótedi.
Qalalyq TKSh bóliminiń basshysy Amantaı Ótelbaev aılyqty ótkizýge barlyq kommýnaldyq qyzmetter daıyn ekenin aıtty. Qala turǵyndary tek óz ýchaskisin ǵana emes, irgeles aýmaqty da retke keltirýleri kerek. Qoqystar "Bıg begı" dep atalatyn arnaıy úlken qaptarǵa jınalatyn bolady.
"Eki aılyqtyń sheńberinde qoqystardy jınap qana qoımaı, ǵımarattyń qorshalǵan qasbetterin retke keltiretin bolamyz", - dedi Amantaı Ótelbaev.
Aılyq aıasynda kósheler men saıabaqtarǵa 30 myńnan astam kóshet otyrǵyzylady. Jaqynda Óskemen qalasynan terek, sheten sııaqty aǵashtardyń kóshetteri ákelingen.
Birinshi senbilik ótkizilgennen keıin ýchaskelik ınspektorlardyń qatysýymen reıd júrgiziledi. Al óz aýmaǵyn qoqystan tazartpaǵan kásipkerlerge aıyppul salynady.
