Semeı kósheleri erigen qar sýynan tazartylýda
SEMEI. QazAqparat - Semeıde qar shyǵarý jáne erigen qar sýyn aǵyzý jumystary qarqyn alyp, aryqtar men qubyrlar, sý jınaqtalatyn oryndar tazartylýda. Turǵyndardyń ótinishi boıynsha úılerine sýdyń jolyn bógeıtin ınertti materıaldar da jetkizilýde, dep habarlaıdy QazAqparat.
Semeıde qala kóshelerindegi erigen qar sýyn aıdaý jáne ınertti materıaldardy jetkizý úshin 17,1 mln teńge, al úıilgen qardy shyǵarý úshin jergilikti bıýdjetten 49 mln. teńge qarajat bólindi.
«2018 jyldyń 13-shi qarashasynan 2019 jyldyń 11 naýryzy aralyǵynda qaladan 81200 m3 qar shyǵaryldy. Bul jumystar áli de jalǵasýda. Búginde Janataıuly, Krasına, 2-shi Kıevskaıa, Kıevskaıa, Nurbaev, Aıagýzskaıa, Porhomenko sııaqty sý basý qaýpi bar kósheler qardan tazartylyp jatyr»,-delingen qalalyq ákimdiktiń baspasóz qyzmeti taratqan habarlamada.
Aǵymdaǵy jyldyń 28 aqpanynan Semeı qalasynyń jolaýshylar kóligi jáne avtomobıl joldary bóliminde erigen sýdy aıdaýǵa, sondaı-aq ınertti materıaldardy jetkizýge turǵyndardan ótinimder qabyldaýda. Búginge deıin turǵyndardan 274 ótinish túsken. Nátıjesinde 5900 m3 sý sorylyp, 157 kólik ınertti materıal jetkizilgen. Qazir kóshedegi qar sýyn aıdaý jumystarymen kúndelikti 31 birlik arnaıy tehnıka jumys isteýde.
