«Semeı-Qaınar» tasjoly keler jyly tolyqtaı jóndeledi - ShQO
SEMEI. QazAqparat – Shyǵys Qazaqstan oblysynyń ákimi Danıal Ahmetov jumys saparymen burynǵy Abyraly aýdanynyń ortalyǵy Qaınar aýylynda boldy, dep habarlaıdy QazAqparat tilshisi.
Bul jaıly aımaq basshysy Facebook jelisindegi jeke paraqshasynda jazdy.
«Óńirdegi barlyq burynǵy aýdan ortalyqtaryn damytýǵa baǵyttalǵan keshendi jospar ázirlenýde. Ókinishke qaraı, búginde Qaınar turǵyndary memlekettik organdardan qarapaıym anyqtama alý úshin Semeıge barýǵa májbúr. Sebebi, aýylda 26 qyzmettiń tek 16 túri kórsetiledi. Sondyqtan búgin qala ákimi Nurymbet Saqtaǵanovqa máseleni sheship, tez arada usynys engizýdi tapsyrdym», - dedi ol.
Onyń aıtýynsha, aýyldaǵy mektepke, mádenıet úıine jóndeý jumystaryn júrgizý qajet. Osy maqsatta tıisti qarajat bólinedi.
«Máselen, mekteptegi sport zaldyń terezesi men edenin tolyq aýystyryp, ǵımarattyń shatyry men qasbetin jańartý kerek. Dırektordyń aıtýynsha, maman tapshylyǵy joq. Bıyl ınternet jelisi tartylyp, ІT, robot tehnıkasy synyptary tolyq jumys istep tur. Alaıda bilim sapasyna qatysty suraqtar bar. Búginde oblys boıynsha UBT baly orta eseppen 85-ti qurasa, munda 75. Bilim basqarmasy máseleni baqylaýǵa alýy tıis. Sondaı-aq Qaraóleń aýyldyq okrýginiń 2500 turǵynyna qyzmet etetin aýrýhananyń kútimi men qyzmet sapasyna taǵylar syn kóp. Dári saqtalatyn qarapaıym jıhazdyń esigi synyp jatyr. Ókinishtisi, meıirbıkeler ony jasyryp álek. Naýqastar jatatyn bólmelerde sý joq, esikteriniń tutqasy túsip, áreń ashylyp, jabylady», - dedi Danıal Ahmetov.
Osy rette jóndeý jumystary júrgizilip, qajetti qural-jabdyqtardy alýǵa qarajat bólinbek. Eskirip ketken ýltra-dybystyq zertteý qurylǵysy tez arada jańartylady.
«Sonymen qatar Qaınarǵa dárigerlerdi tartý maqsatynda mamandarǵa arnalǵan baspana salamyz. Aýyl kósheleri tolyq jóndeýden ótedi. Al «Semeı-Qaınar» tasjoly keler jyly tolyq jóndelip bitedi. Mádenıet úıinde ornalasqan kitaphana qyzmetkerleriniń aıtýynsha, ǵımarat ishi sýyq. Baıqaǵanym, aýrýhana men mektep ishi de salqyn. Al aýyl ákimdigi bolsa, rezervte turǵan qazandyqty iske qosýǵa asyǵar emes. Kómir men qarjy tapshylyǵy joq. Tek sapaly jumys atqarýǵa ynta baıqalmaıdy. Bul másele de bıyl sheshimin tabady», - dedi oblys ákimi.
