Semeı kásipkerleri koronavırýsqa baılanysty shekteý sharalaryn qoldap otyr

SEMEI. QazAqparat - Shyǵys Qazaqstan oblysynyń ákimi Danıal Ahmetov Semeı qalasynyń kásipkerlerimen onlaın kezdesý ótkizdi, dep habarlaıdy QazAqparat ShQO aqparat ortalyǵyna silteme jasap.

Basqosý barysynda oblystyń bas sanıtar dárigerimen birge qaladaǵy sanıtarlyq-epıdemıologııalyq jaǵdaıǵa baılanysty shekteý sharalaryn kúsheıtý jaıy talqylandy. Barlyq usynys qoǵammen talqylanyp, kelisildi jáne búgin oblystyń bas dárigeriniń kezekti qaýlysy shyqty.

Jıynda aımaq basshysy Semeı turǵyndaryna koronavırýs ınfektsııasy týraly túsindirý jumystary álsiz júrgizilip jatqanyn aıtty. Danıal Ahmetov qaladaǵy sanıtarlyq-epıdemıologııalyq jaǵdaı jóninde halyqty kúndelikti aqparattandyrýdy jónge salýdy tapsyrdy.

Aıta keteıik, Shyǵys Qazaqstanda 14 maýsymǵa deıin 252 adamda koronavırýs belgileri anyqtalǵan. Onyń deni - Semeı qalasynan, atap aıtqanda 155 adam atalmysh vırýsty juqtyrǵan. Sońǵy on kúnniń ishinde 56 jaǵdaı tirkelgen. Sońǵy aptada oblystaǵy aýrýdyń úlesi 4,1 paıyzdy qurap otyr.

Oblys boıynsha Semeıdegi epıdemıologııalyq jaǵdaı qıyn. Aýrýdyń qorytyndysy boıynsha 70% Semeıde tirkelgen. Munda kóp jaǵdaı bir oshaqtan tirkelýde. Oblystyń bas sanıtar dárigeri Marat Ismaılovtyń aıtýynsha, 27 úı jaǵdaıynda 82 adam aýyrǵan. Onyń ishinde 12 adam - bir oshaqtan. 4 jaǵdaı bes oshaqta tirkelgen. 3 jaǵdaı - 6 oshaqta, 2 jaǵdaı - 16 oshaqta tirkelgen.

Vırýsty taratýshylar arasynda eshqandaı aýrý belgisi baıqalmaı, naýqastanǵandar da kóbeıýde. Olardyń mundaı dertke shaldyqqandary ózge adamdarmen baılanysqanda anyqtalady. Búginde Semeıde 103 adamda eshqandaı aýrý belgisi joq. Sondaı-aq qaladaǵy kásiporyndarda jappaı juqtyrý jaǵdaıy oryn aldy. Máselen, Semeıdegi teri-venerologııalyq dıspanserde - 37, «Qazpolıgraf» - 27, týysqandarymen aralasqan 15 adam juqtyrǵan.

Bas sanıtar dárigerdiń aıtýynsha, atalmysh derttiń kún sanap ósýine qarapaıym normalar men sanıtarlyq-epıdemıologııalyq talaptardy oryndamaý, araqashyqtyqty saqtamaý sebep bolyp otyr. Semeı qalasyndaǵy jaǵdaıǵa baılanysty ShQO bas sanıtar dárigeriniń qaýlysy shyqty.

Jalpy, oblysta 1512 adammen baılanysta bolǵan 151 oshaq baqylaýda bolady. Onyń ishinde 716 jaqyn baılanys, 796 potentsıaldyǵa jatady.

1512 adam anyqtalyp, oqshaýlandy. 26 karantındik statsıonarda, 1486 úıde oqshaýlanýda.