Semeı qalasynyń oń jaǵalaýynda jańa saıabaq salynady
«Qalanyń oń jaǵalaýynda ornalasqan Begalın kóshesiniń qıylysynan bastap Chelıýskıntsev kóshesinen Sılın kóshesine deıingi bóliginde turǵyndardyń demalýyna jáne bos ýaqytyn ótkizýine arnalǵan saıabaq aımaǵyn qurý josparlanyp otyr. Aýdany 0,2 gektar aýmaqta trotýar plıtalarynan jaıaý júrginshiler joldaryn tóseý boıynsha jumystar júrgizile bastady. Munda balalar oıyn alańdary salynyp, jaryqtandyrylyp, aǵash otyrǵyzylady», - delingen ákimdiktiń baspasóz qyzmeti taratqan habarlamada.
Jergilikti quzyrly organ aqparatyna qaraǵanda, buryn bul aýmaqta qoqys pen kelsilgen aǵash qaldyqtarynyń úıindileri bolǵan. Ony tazartý jumystary osy aıda aıaqtalady.
Buǵan deıin habarlaǵanymyzdaı, bul demalys orynynan bólek, Semeıde taǵy bir tabıǵı saıabaq salynady. Shahardaǵy ekotýrızmdi jaqsartý maqsatynda qaladaǵy «Beıbitshilik» aralynda saıabaq ashylady. Josparǵa sáıkes, onda túrli ósimdikter otyrǵyzylyp, sırek kezdesetin qustardyń túri kóbeıtilmek.
Sondaı-aq, Abaı oblysynyń ortalyǵynda jalpy aýdany 3 500 sharshy metr bolatyn strıt-art, skeıt-park jáne parkýr men vorkaýt sport alańdary bar jańa qoǵamdyq demalys orny boı kóteredi. Ol Semeıdegi aspaly kópirdiń astyna salynady.
