Semeı qalasynda zamanaýı JEO qashan salynady

ASTANA. QazAqparat – Semeı qalasynda jylý elektr ortalyǵyn salý jónindegi jobanyń jańa tehnıkalyq-ekonomıkalyq negizdemesi ázirleip jatyr. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Esterińizge sala ketsek, Memleket basshysy Qasym-Jomart Kemeluly Toqaev osy jylǵy 30 qyrkúıeginde Abaı oblysyna jumys sapary barysynda jergilikti jurtshylyq aldynda sóılegen sózinde Semeı qalasyndaǵy ınfraqurylymynyń tozý máselelerine erekshe nazar aýdaryp, Úkimetke ákimdikpen birlesip, zamanaýı jylý elektr ortalyǵyn salý máselesin qarastyrýdy tapsyrǵan edi. Sondyqtan senatorlar Úkimet basshysynan osy tapsyrmanyń júzege asyrylý barysyn suraǵan bolatyn.

«Memleket basshysynyń joǵaryda kórsetilgen tapsyrmasyn oryndaý aıasynda «Samuryq-Qazyna» AQ Semeı qalasynda JEO salý jónindegi jobanyń jańa tehnıkalyq-ekonomıkalyq negizdemesin (budan ári – TEN) ázirleýge kiristi. TEN aýqymynda Semeı qalasyn damytýdyń perspektıvalyq josparlaryn eskere otyryp, jylýmen jabdyqtaý máselesin keshendi sheshý qaralatyn bolady. TEN daıyndaý boıynsha jumystardy aıaqtaý merzimi - 2023 jyldyń úshinshi toqsany. Jobany iske asyrýǵa ınvestıtsııalar tartý TEN nátıjeleriniń negizinde «Elektr energetıkasy týraly» Qazaqstan Respýblıkasy Zańynyń 15-6-babynda kózdelgen qoldanystaǵy tetik – jańadan paıdalanýǵa beriletin generatsııalaıtyn qondyrǵylardy salýǵa tender ótkizý jolymen qamtamasyz etiledi», - dedi Álıhan Smaıylov jaýabynda.