Semeı qalasynyń ákimi qyzmetinen ketti
SEMEI.KAZINFORM – Semeı qalasynyń ákimi Talǵat Muratov qyzmetinen ketti.
Talǵat Muratovtyń jumystan ne sebepti shyqqandyǵyna qatysty ákimdikten ázirge jaýap bermedi. Al Semeı qalasyna jańa ákimdi halyq saılamaq.
- Saılaý 12 qazan kúnine bekitilgen. Kandıdattardy tirkeý jumystary 16 qyrkúıekte aıaqtalady. Osy kúni saılaýǵa qatysatyn úmitkerlerdiń tolyq tizimi jarııalanady, - dep habarlady qala ákimdiginiń baspasóz qyzmetinen.
Talǵat Batyruly 1972 jyly 28 qańtarda Almaty oblysynda dúnıege kelgen. Úsh joǵary bilimi bar. 2007 jyly Qazaq bas sáýlet-qurylys akademııasyn «Sarapshy-baǵalaý», 2015 jyly Qazaq ınnovatsııalyq ýnıversıtetin «Quqyqtaný», al 2018 jyly Qazaq qatynas joldary ýnıversıtetin «Tehnıka jáne tehnologııalar» mamandyqtary boıynsha bitirgen.
Eńbek jolyn 1993 jyly Semeı qalasyndaǵy «Stroıdetal» kompanııasynyń atqarýshy dırektory bolyp bastaǵan. Keıin «Semeı Selhoztehnıka» JShS-de ekonomıst, «Komfort-Ekspress» JShS dırektorynyń orynbasary, sondaı-aq «Taý-ken metallýrgııa jabdyqtarynyń konstrýktorlyq bıýrosy» JShS fılıalynyń dırektory bolyp jumys istedi.
2012-2014 jyldary - «Shyǵys Samǵaý» jaýapkershiligi shekteýli seriktestigi Bas dırektorynyń orynbasary. 2014 jylǵy mamyrdan qyrkúıekke deıin - «ATF Bank» aktsıonerlik qoǵamynyń Semeı qalasy fılıalynyń bólshek saýda ortalyǵy bólimshesiniń bastyǵy. 2014-2015 jyldary-Besqaraǵaı aýdanynyń qurylys, sáýlet jáne qala qurylysy bóliminiń bas mamany. 2016-2018 jyldary-Jarma aýdanynyń sáýlet, qala qurylysy jáne qurylys bóliminiń basshysy. 2018 jyldan 2022 jylǵa deıin – Jarma aýdany ákiminiń orynbasary.
2022-2024 jyldary aralyǵynda Besqaraǵaı aýdanyn basqardy. Al Semeı qalasynyń ákimi qyzmetinde 2024 jyldyń jeltoqsanynan osy ýaqytqa deıin jumys istedi.
Eske salsaq, osyǵan deıin Sanjar Jarkeshov energetıka vıtse-mınıstri qyzmetine taǵaıyndalǵany habarlanǵan.