Semeı qalasyna 1 qazannan bastap jylý berildi
SEMEI. KAZINFORM – Abaı oblysy ákiminiń orynbasary Bekjan Bapyshev Semeı qalasyndaǵy jylytý maýsymynyń ótý barysyna qatysty pikir bildirdi.
Onyń aıtýynsha, búginde oblys jylytý maýsymyna tolyq daıyn, jylý berý jumystary shtattyq rejımde júrgizilip jatyr.
1 qazannan bastap Semeıdegi áleýmettik nysandar kezeń-kezeńimen jylý júıesine qosyldy. Qazirgi ýaqytta kópqabatty turǵyn úılerge de jylý berý jumystary júrgizilip jatyr.
— Semeı qalasy boıynsha 2 jyldyq ótpeli 5 joba bar. 1 joba boıynsha merdiger uıym tarapynan olqylyqtar boldy. Qurylǵylar ýaqytynda jetkizilmedi. Búgingi kúni qurylǵylar tolyǵymen ornatyldy. Biz jylytý maýsymyna tolyǵymen kirdik. Birinshi kezekte áleýmettik nysandar qosyldy. Ekinshi kezekte turǵyn úıler qosylyp jatyr. Turǵyndardyń alańdaýyna esh negiz joq ekenin jetkizgimiz keledi, — dedi ol.
Bekjan Bapyshev óńirdegi jylýmen qamtý máselesi turaqty baqylaýda ekenin atap ótti.
Aıta ketsek, buǵan deıin aımaq basshysy Berik Ýálı Semeı qalasyndaǵy №1 Jylý elektr ortalyǵy men «343 kvartal» ortalyq jylytý pýnktiniń jumysymen tanysqany habarlanǵan edi. Oblys ákimi №1 Jylý elektr ortalyǵyna bardy. 1934 jyly paıdalanýǵa berilgen nysan jylý qýatyn óndirý jáne berýmen aınalysady. Ortalyqtyń ornatylǵan qýaty – 374 Gkal/saǵ, al qoldanystaǵy qýaty – 276,4 Gkal/saǵ. Aımaq basshysy aldaǵy jylytý maýsymynda barlyq nysandardyń turaqty ári úzdiksiz jumys isteýin qamtamasyz etý basty mindet ekenin atap ótti.
