Semeı qalasy ákiminiń saılaýyna daýys berý bastaldy
SEMEI. KAZINFORM — Búgin tańǵy saǵat 7:00-de alǵash ret Semeıde Qazaqstandaǵy oblys ortalyǵy ákiminiń tikeleı saılaýy bastaldy, dep habarlaıdy Kazinform tilshisi.
Semeı qalasy ákiminiń saılaýyna daýys berý bastaldy.
Qazirde shaharda 128 saılaý ýchaskesi óz jumysyn bastady, onyń ishinde 110 — ashyq, 18 — azamattardyń ýaqytsha bolatyn jerindegi ýchaske (jabyq).
Komıssııalardyń jalpy quramy — 929 azamatty quraıdy. Al saılaýshylar sany — 220 761 adam.
Barlyq saılaý ýchaskeleri keńse taýarlarymen, aqparattyq stendtermen, daýys berý jáshikterimen jáne jasyryn daýys berý kabınalarynmen qamtylǵan.
— Barlyq ýchaske ýaqytynda ashylyp, qalypty rejımde jumys istep jatyr. Bul — Semeı qalasy jáne tutas el úshin mańyzdy oqıǵa. Sol sebepti turǵyndardyń belsendi qatysatynyna úmittenemiz, — dedi qalalyq aýmaqtyq saılaý komıssııasynyń tóraıymy Gúljan Qýanysheva.
Daýys berý saǵat 20:00-ge deıin jalǵasady, odan keıin daýys sanaý bastalady.
Qazir alǵashqy bolyp daýys berýge kelgen turǵyndarǵa syılyqtar tabystalyp jatyr.
Eske sala keteıik, Semeıdiń burynǵy ákimi Talǵat Muratovtyń ókilettigi merziminen buryn toqtatylǵan edi.
Bastapqyda saılaý dodasyna tórt úmitker tirkeldi. Alaıda olardyń biri — Balalar men jasóspirimder shyǵarmashylyǵy saraıynyń dırektory, qalalyq máslıhat depýtaty Qanat Shapatov 7 qazanda jeke sebepterine baılanysty kandıdatýrasyn alyp tastaıtynyn málimdedi. Osylaısha, saılaý bıýlleteninde úsh úmitker ǵana qaldy.