Semeı GES-in salýǵa qatysty qujattar daıyndalyp jatyr

ASTANA. KAZINFORM – Semeı GES-iniń qurylysy birtutas júıedegi elektrlik manevrlik qýatty 300 MVt-qa arttyrady.

«Samuryq-Energo» AQ málimetine qaraǵanda, Semeı GES-i iske qosylsa, Shúlbi GES-iniń retteý qýatyn 500 MVt-qa deıin arttyrady. Bul qadam biryńǵaı elektr jelisine túsetin júkteme kezinde Shúlbi GES-i qýatyn ońtaıly paıdalanýǵa múmkindik beredi. Óndirilgen energııa Qazaqstannyń biryńǵaı elektr energııasy jelisine qosylady.

Ázirge, Semeı GES-in salatyn merdiger kompanııa iriktelmegen.

«Qazir jobalyq qujattamany ázirleý kezeńindemiz. Onyń qurylysyna jumyldyrylatyn merdigerler týraly aqparat joq, óıtkeni merdigerlerdi tańdaý jobalaýdyń barlyq kezeńderi aıaqtalǵannan keıin jáne jobalyq sheshimderdi maquldaǵannan keıin júzege asyrylady», - delingen «Samuryq-Energo» AQ-nyń Kazinform agenttigine bergen jaýabynda.

Aıta keteıik, buǵan deıin Qazaqstan Reseımen birlese otyryp, Ertis ózeniniń boıynda gıdroelektro stantsııa salý týraly kelissóz júrgizip jatqany habarlandy.