«Semeı» fýtzaldan Chempıondar lıgasynyń kelesi satysyna shyqty
ASTANA. KAZINFORM - Búgin, 5 jeltoqsanda fýtzaldan UEFA Chempıondar lıgasy 1/8 fınalynda qazaqstandyq «Semeı» Polshanyń «Pıast» komandasyna qarsy qarymta oıynyn ótkizdi.
Semeıde ótken alǵashqy kezdesýde oıyn 3:3 esebimen teń aıaqtaldy.
Sondyqtan qazaqstandyq klýb úshin tek jeńiske jetý qajet edi.
Kezdesý olar úshin qolaısyz bastaldy. Polshalyq klýb oıynnyń 1, 6-mınýtynda eki gol soǵyp ketti. Birinshi kezeńde semeılik klýb sapynan Nursultan Pııaly 18, Rınat Tóreǵazın 19-mınýtta mergendik tanytyp, tarazy basyn teńestirdi.
Ekinshi kezeńde qazaqstandyq komanda basymlyqty arttyrdy. Bul joly 28-mınýtta Pedrınıý kózdegen nysanadan múlt ketken joq.
Al 31-mınýtta «Semeı» sapynan Rınat Tóreǵazın taǵy bir márte gol soqsa, polshalyq klýb oǵan bir golmen jaýap qaıyrdy.
Oıynnyń 39-mınýtynda qazaqstandyq klýbtan Marselo qorytyndy esepti belgiledi.
Osylaısha «Semeı» qarsylasynan 5:3 esebimen basym túsip, jarystyń kelesi satysyna shyqty.
Bıyl fýtzaldan Chempıondar lıgasynyń elıtalyq kezeńine ózgerister engizildi.
Jarystyń atalǵan satysynda 16 komanda segiz jupqa bólindi. Komandalar óz alańynda jáne syrt alańda bir-bir kezdesýden ótkizdi. Bul oıyndar 2025 jyldyń 24 qarasha-6 jeltoqsan aralyǵynda boldy.
Odan keıin 2026 jyldyń 23 aqpany men 6 naýryzy aralyǵynda komandalar sol ereje boıynsha shırek fınalda synǵa túsedi.
Fınal 2026 jyldyń mamyr aıynda Italııanyń Pesaro qalasynda ótedi. Onda tórt komanda sheberlik baıqasady. Aldymen jartylaı fınal bolsa, odan keıin fınal men 3-oryn úshin oıyndar ótkiziledi.
