«Semeı» fýtzal klýby Chempıondar lıgasyndaǵy alǵashqy jeńisine jetti
ASTANA. INFORMSPORT — Qazaqstandyq «Semeı» fýtzal klýby UEFA Chempıondar lıgasyndaǵy alǵashqy oıynyn A jolynyń negizgi kezeńinen bastady.
Qazaqstandyq komanda birinshi topta synǵa túsedi. Qarsylastary — «Barselona» (Ispanııa), «Lýchenets» (Slovakııa), «Mınerva» (Shveıtsarııa).
Semeılik klýb alǵashqy kezdesýinde Slovakııanyń «Lýchenets» komandasyn 6:0 esebimen qapy qaldyrdy. Olardyń qatarynan Rınat Tóreǵazın 7-mınýtta esep ashsa, Pedrıno 18-mınýtta esepti ústemeleı tústi.
Ekinshi kezeńde qazaqstandyq komanda taǵy tórt gol soqty. Aldymen Rodrıgıno 29-mınýta basymdyqty arttyrsa, Nursultan Pııaly 32, Dedezıno 36, Shyńǵys Esenamanov 37-mınýtta kózdegen nysanadan múlt ketken joq.
Osylaısha «Semeı» 6:0 esebimen basym túsip, jarystyń bul satysyndaǵy alǵashqy jeńisin toılady.
Endi olar búgin, 29 qazanda Ispanııanyń «Barselona» klýbymen sheberlik baıqassa, odan keıin 31 qazanda Shveıtsarııanyń «Mınerva» komandasymen oınaıdy.
Sondaı-aq búgin qazaqstandyq «Qaırat» (Almaty) jarystyń atalǵan satysynda Izraıldiń «Beıtar» klýbymen oınap jatyr. Odan keıin almatylyq ujym 31 qazanda Belgııanyń «Anderleht» komandasymen kezdesedi.
Eske salsaq, Qazaqstan fýtzaldan 2030 jylǵy Eýropa chempıonatyn ótkizýge úmitker atandy.
