Semeı avtobýstarynda elektrondy bılet engiziledi
SEMEI. QazAqparat - Semeıde 2019 jyldan bastap avtobýstar elektrondy bıletke kóshedi. Bul týraly qala ákimi Ermak Sálimov qoǵamdyq kólikterge jasaǵan kezekti reıd kezinde aıtty, dep habarlaıdy QazAqparat.
2019 jyldyń aqpanynda qoǵamdyq kólikter arasynda tender ótedi. Sodan keıin kelisimshart boıynsha tasymaldaýshylarǵa artylatyn jaýapkershilik kúsheıedi. Olar ózderiniń avtobýstaryn jańartyp, elektrondy bılettendirý júıesin jolǵa qoıýy kerek.
Qala ákiminiń sózinshe, bıletterdiń elektrondy bolýy qyzmet sapasyn arttyryp, tasymaldaýshylardyń kirisin naqty anyqtaýǵa múmkindik beredi.
«Búgingi kúni biz ınvestor arqyly elektrondy bıletti qarjylandyrý máselesin qarastyryp jatyrmyz. Bizge kásipker tarapynan «Men osy jabdyqty satyp alamyn» degen usynys tústi. Qazir osy máseleni zerdeleý ústindemiz. Eger barlyq avtobýstarǵa elektrondy bılettendirý júıesi ornatylsa, jolaýshylar qozǵalysy týraly naqty derekter alýǵa jáne tasymaldaýshylardyń kirisin baqylaýǵa múmkindik bolady», - dedi qala basshysy.
Aıta keteıik, bıyldan bastap oblys ákimi Danıal Ahmetovtyń tapsyrmasymen avtobýs parkterin jańartý maqsatynda baıqaý talaptary túbegeıli ózgerdi. Aldaǵy ótetin baıqaý qarsańynda tasymaldaýshy kásiporyndar avtobýs jańarta bastady. Mysaly, «Mýsapırov» seriktestigi qala boıynsha № 5,8,22 baǵytynda qyzmet kórsetetin orta sanattaǵy 20 avtobýsy bar parkti jańalady. Onyń ústine, orta sanattaǵy taǵy 50 avtobýs alýdy josparlap otyr. Jalpy qalaǵa ártúrli sanattaǵy 170 jańa avtobýs satyp alý kerek.
