Semeı aýrýhanalaryna sońǵy bes jylda 300-ge jýyq zamanaýı jabdyq alyndy
Bul jaıly halyq aldynda esep bergen qala ákimi Baqytjan Baıahmetov málimdedi.
«Densaýlyq saqtaý salasyna erekshe kóńil bólinýde. Sońǵy 5 jyl ishinde 8,3 mlrd teńge ınvestıtsııa salynyp, halyqaralyq standarttarǵa sáıkes keletin 300-ge jýyq zamanaýı jabdyq satyp alynǵan. Jedel járdem parki 91 avtokólikke jańartyldy. Sondaı-aq biregeı ıadrolyq medıtsına ortalyǵy iske qosyldy», - dedi ol.
Shahar basshysynyń aıtýynsha, radıonýklıdtik terapııa bólimshesi álemdik deńgeıge sáıkes keledi. Qazirgi tańda onda 217 naýqas emdelip, 446 adam dıagnostıkalyq zertteýlerden ótti.
«Bıyl perınataldyq ortalyq bazasynda balalardy ońaltý jáne katamnez ortalyǵy ashyldy. Sońǵy 3 jylda jetekshi sheteldik klınıkalarda 74 medıtsına qyzmetkeri oqytylyp, biliktilikterin arttyrdy. Osy baǵyttaǵy jumystar aldaǵy ýaqytta da jalǵasyn tappaq», - dedi Baqytjan Baıahmetov.