Semeı áýejaıynyń ushý-qoný jolaǵynan quny 1,4 mln teńgelik shamdar urlandy
SEMEI. QazAqparat – Semeı qalasyndaǵy áýejaıdyń ushý-qoný jolaǵynan quny 1,4 mln teńgelik shamdar urlanǵan, dep habarlaıdy QazAqparat tilshisi.
Semeı stantsııasyndaǵy jelilik polıtsııa bólimine belgisiz bireýlerdiń halyqaralyq áýejaıdyń ushý-qoný jolaǵynan 4 jaryqtandyrý shamyn urlap ketkendigi jaıly aqparat túsken. Osynyń saldarynan áýejaıǵa 1 440 268 teńge mólsherinde materıaldyq shyǵyn keltirildi. Bul týraly oblystyq Kólik polıtsııasy basqarmasynyń bastyǵy Ońal Bekıev málim etti.
«Atalǵan fakti boıynsha birden QR QK-niń 188-baby 3-bóliginiń 3-tarmaǵymen sotqa deıin tergeý amaldary qolǵa alynǵan. Jedel -izdestirý sharalarynyń nátıjesinde osyǵan uqsas qylmystar úshin birneshe ret sottalǵan 36 jastaǵy Semeı turǵyny ustaldy. Ol óz kinásin moıyndady», - dedi Ońal Bekıev.
Onyń aıtýynsha, Semeı qalasynyń №2 sotynyń úkimimen er adam 3 jyl merzimge bas bostandyǵynan aıyryldy.
