Semeı áýejaıy halyqaralyq sertıfıkatqa ıe boldy
ÓSKEMEN. QazAqparat - Semeı qalasynyń áýejaıy halyqaralyq standartqa saı áýejaı retinde tirkeldi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Bıyl Shyǵys Qazaqstanda joldardy jóndeýge 55 mıllıard teńge bólingen. Onyń kóbi týrıstik mańyzǵa ıe joldarǵa jumsaldy.
«Sibe kólderine, «Nurtaý» jáne «Altaı Alpisi» taý shańǵysy bazalaryna aparatyn joldar qalpyna keltirildi. Osy jyly Alakól baǵytyndaǵy Maqanshy - Jalańashkól joly jóndelip bitti», - deıdi jolaýshylar kóligi jáne avtomobıl joldary basqarmasynyń basshysy Nurjan Jumadilov.
Jaz boıy Borodýlıha-Shemonaıha, Kókpekti-Samar joldarynyń telimderi jóndelip, Semeı-Qaraýyl baǵytynda jóndeý jumystary aıaqtaldy.
«Sońǵy eki jylda Óskemen men Semeı kóshelerine qomaqty qarjy bólindi. Jalpy, eldi mekenderdiń kóshe-joldaryna osy jyly 10,7 mıllıard teńge bólinip, ıgerildi» - deıdi Nurjan Jumadilov.
«Nurly jol» baǵdarlamasy aıasynda Omby-Maıqapshaǵaı halyqaralyq joly, Taskesken-Baqty respýblıkalyq trassasy, Osınov asýynyń aınalma joly qaıta qalpyna keltirilýde. Sheteldik kompanııalardyń qatysýymen Taldyqorǵan-Qalbataý-Óskemen jáne Qalbataý-Maıqapshaǵaı joldaryn jóndeý jumystary bastalyp, kelesi jylǵa qalyp otyr.
Semeı áýejaıyn qaıta jańǵyrtý jobasyna 10 mıllıard 197 mıllıon teńge jumsaldy. Sonyń arqasynda nysan halyqaralyq reısterdi qabyldaýǵa múmkindik aldy.
«Ushý-qoný jolaǵyna jaryq-dybystyq qurylǵy ornatyldy. Bul áýe kemelerin kez kelgen aýa raıynda qabyldaýǵa múmkindik beredi. Áýejaı ǵımaraty da kúrdeli jóndelip, aýmaǵy tolyq qorshaldy», - deıdi Nurjan Jumadilov. Bıylǵy qazanda áýejaı halyqaralyq standarttarǵa saı ekenin rastaıtyn sertıfıkat aldy.
Ázirge atalmysh áýejaı Óskemen - Semeı - Úrjar, Semeı - Almaty, Semeı - Astana baǵytyndaǵy «AN-24» tıpti ushaqtardy qabyldap otyr. Keleshekte munda 300-ge jýyq jolaýshy tasıtyn «Boıng», «Eırbas», «IL-76» áýe kemeleri qona alatyn bolady. Áýejaı táýligine 25-30 ushaq qabyldap, saǵatyna 200 jolaýshyǵa qyzmet kórsetýge qaýqarly.
Áýejaı jyl sońyna deıin resmı túrde qoldanysqa beriledi. Munda Reseı, Túrkııa, Mysyr, Arab ámirlikteriniń kompanııalaryn tartý kózdelgen.
