Semeı áýejaıy avıaotyn baǵasyn negizsiz kótergeni úshin jaýapqa tartyldy

SEMEI. KAZINFORM — Qazaqstan Respýblıkasy Básekelestikti qorǵaý jáne damytý agenttiginiń Abaı oblysy boıynsha departamenti «Semeı halyqaralyq áýejaıy» JShS-ne qatysty tergep-tekserýdi aıaqtady.

Tergep-tekserý barysynda kásiporynnyń bólshek saýdada avıaotynǵa monopolııalyq joǵary baǵany belgileý jáne ustap turý arqyly ústem jaǵdaıyn teris paıdalanǵany anyqtalǵan. Bul Qazaqstan Respýblıkasy Kásipkerlik kodeksiniń 174-baby 1) tarmaqshasynda kózdelgen básekelestikti qorǵaý salasyndaǵy zańnamany buzýǵa jatady.

— Atalǵan fakt boıynsha Departament ákimshilik is qozǵady. Semeı qalasynyń Ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen JShS kináli dep tanylyp, 8,8 mln teńge mólsherinde ákimshilik aıyppul salyndy, sondaı-aq monopolıstik qyzmet nátıjesinde alynǵan 8,5 mln teńge kólemindegi monopolııalyq kiris tárkilendi, — delingen habarlamada.

Qaýlyǵa shaǵym jasalǵanymen, Abaı oblystyq sotynyń qylmystyq ister jónindegi sot alqasy qaýlyny ózgerissiz qaldyryp, apellıatsııalyq shaǵymdy qanaǵattandyrýsyz qaldyrdy.

Qazirgi ýaqytta sot qaýlysy zańdy kúshine endi.

Sonymen qatar, Departament bólshek saýdada avıaotynǵa negizdelgen baǵa belgileý arqyly monopolııalyq joǵary baǵany belgileý men ustap turýdy toqtatý týraly nusqama berdi. Nusqama kásiporyn tarapynan tolyq kólemde oryndaldy.

Buǵan deıin Shymkent áýejaıy avıaotyn satý qyzmetinde negizsiz paıda tapqanyn jazǵan edik.