«Semeı-Astana-Semeı» baǵytynda jańa áýe reısi ashylady
SEMEI. KAZINFORM – Semeıden elimizdiń iri qalalaryna qatynaıtyn turaqty áýe reısteriniń sany artady.
Bıylǵy 27 sáýirden «Semeı-Astana-Semeı» baǵytynda syıymdylyǵy 48 oryndyq «An-24» ushaǵy jolaýshylardy tasymaldaı bastaıdy. Reısti «ıÝjnoe nebo» áýe kompanııasy júzege asyrady. Semeıden Astanaǵa ushý ýaqyty – keshki saǵat 18:15, Astanadan Semeıge ushý ýaqyty – keshki saǵat 21:15.
Bul týraly oblys ákimi Berik Ýálı Semeıdegi halyqaralyq áýejaıdyń jumysymen tanysý barysynda aıtty.
– Jolaýshylardyń ótinishin eskere otyryp Kólik mınıstrligi, áýe kompanııasy jáne oblys ákimdiginiń úsh jaqty kelisimi nátıjesinde osyndaı ýaǵdalastyqqa qol jetkizdik. 10 mamyrǵa deıin aptasyna úsh reıs oryndalady. Al mamyrdyń ortasynan bastap ushý jıiligi aptasyna 5 retke deıin ulǵaıady. Áýe kompanııasynyń quryltaıshylary bolashaqta jaz mezgilinde qatynaıtyn jańa ushaqtardy jelige shyǵaratynyn aıtyp otyr. Aldaǵy ýaqytta Qaraǵandy baǵytynda sýbsıdııalanatyn jańa áýe reısin ashý josparymyzda bar. Qazirgi ýaqytta Kólik mınıstrligimen kelissóz júrgizilýde, - dedi aımaq basshysy.
Bıylǵy 1 mamyrdan bastap «Almaty-Semeı-Almaty» (aptasyna úsh ret), «Astana-Semeı-Astana» (aptasyna bir ret) baǵyttarynda qosymsha reıs engiziledi. Budan bólek 1 maýsymnan bastap «FlyArystan» áýe kompanııasy «Shymkent – Semeı – Shymkent» baǵyty boıynsha jańa reısti iske qospaq.
Jolaýshylar aptasyna 2 ret, dúısenbi jáne beısenbi kúnderi qatynaıdy. Sondaı-aq dúısenbi men beısenbide «Skat» áýe kompanııasy «Almaty-Úrjar-Almaty», «Astana-Úrjar-Astana» reısterin árqaısysyn aptasyna 6 retten oryndaı bastaıdy.
Qazirgi ýaqytta Semeı qalasynan «Semeı – Almaty», «Semeı – Astana» jáne «Semeı – Úrjar» baǵyttary boıynsha turaqty áýe reısteri oryndalýda. Atalǵan reısterdi «FlyArystan» jáne «ıÝjnoe nebo» áýe kompanııalary júzege asyryp keledi.