Semeı ákimdigi men kommýnaldyq kásiporyn 80 mln teńge tóleýge mindetteldi
ASTANA. KAZINFORM – Abaı oblysynyń mamandandyrylǵan aýdanaralyq ekonomıkalyq soty Semeı qalasynyń ákimdigi men kommýnaldyq kásiporynnan iske aspaǵan qatty turmystyq qaldyqtardy basqarý júıesin jańǵyrtý jobasyna baılanysty árqaısysynan 40 mıllıon teńgeden óndirip alý týraly sheshim shyǵardy.
Atalǵan joba 2021 jyly Eýropalyq qaıta qurý jáne damý bankiniń qatysýymen bastalǵan. Sol kezde Shyǵys Qazaqstan oblysynyń ákimdigi, Semeı qalasynyń ákimdigi, «Kópsalaly paıdalaný kásiporny» memlekettik kommýnaldyq kásiporny jáne EQDB arasynda kommýnaldyq ınfraqurylymdy jańǵyrtýǵa qoldaý kórsetý týraly kelisim jasalǵan. Osy kúni bank kommýnaldyq kásiporyn úshin 3,83 mlrd teńge kóleminde kredıttik jeli ashqan.
Alaıda 2022 jyly joba is júzinde toqtap qaldy. Semeı qalasy ákimdigi kommýnaldyq kásipornynyń mindettemelerin toqtatý týraly ótinishine súıene otyryp, EQDB kelisimdi buzyp, bereshekti merziminen buryn óteý talabyn qoıǵan. Quqyqtyq súıemeldeý shyǵyndaryn qosa alǵanda, jalpy qaryz kólemi 120,9 mln teńgeden asty.
Abaı oblysy qurylǵannan keıin jaǵdaı odan ári kúrdelene túsken. Shyǵys Qazaqstan oblysynyń ákimdigi óz aýmaǵynan tys ornalasqan jobalardy qarjylandyrýǵa quqyqtyq negizi joq ekenin málimdep, barlyq mindettemeler jańa ákimshilik organdarǵa ótkenin kórsetken. Alaıda Abaı oblysynyń ákimdigi halyqaralyq qarjy ınstıtýty aldyndaǵy qaryzdy óteýden bas tartqan.
Nátıjesinde EQDB-men áriptestik qatynasty saqtaý maqsatynda Shyǵys Qazaqstan oblysynyń ákimdigi bereshekti óz qarajaty esebinen jaýyp, kelisimniń ózge qatysýshylaryna qatysty regrestik talappen sotqa júgingen.
Sot otyrysynda Semeı qalasy ákiminiń apparatynyń ókili jobanyń iske aspaǵanyn, sondaı-aq ákimdik kredıttik sharttyń tarapy bolyp tabylmaıtynyn alǵa tartyp, qarjylyq mindettemeler boıynsha jaýap bermeýi tıis ekenin málimdegen.
Alaıda sot bul ýájben kelispegen.
– Jobany qoldaý týraly kelisim sharttaryna sáıkes, Shyǵys Qazaqstan oblysynyń ákimdigi, Semeı qalasynyń ákimdigi jáne kommýnaldyq kásiporyn Eýropalyq qaıta qurý jáne damý banki aldynda ortaq mindettemege ıe jáne birdeı jaýapkershilik kóteredi. Mindettemelerdiń ShQO ákimdigi tarapynan oryndalýyna baılanysty, onda regrestik talap qoıý quqyǵy týyndaǵan, – delingen sot sheshiminde.
Nátıjesinde sot Semeı qalasynyń ákimdigi men memlekettik kommýnaldyq kásiporynnyń árqaısysynan 40 mıllıon teńgeden, sondaı-aq memlekettik bajdy bıýdjet kirisine óndirý týraly qaýly shyǵardy. Sot sheshimi zańdy kúshine endi.
Buǵan deıin Semeı turǵynyn aldamaq bolǵan alaıaqtar birden úsh memlekettik organ atyn jamylǵany habarlandy.