Semeı ákimdigi 2,6 mln eýronyń qoqys óńdeý jabdyǵyn jaramsyz qyldy – Bas prokýratýra

ASTANA. KAZINFORM – Bas prokýrordyń aǵa kómekshisi Ashat Aýqatov Májilistegi dóńgelek ústelde Semeı qalasynda «Jasyl damý» mekemesiniń aqshasyna alynǵan qymbat qondyrǵynyń ashyq aspan astynda tozyp jatqanyn málim etti.

«Semeı qalasynda «ÓKM» operatory 2020 jyly 2,6 mıllıon eýroǵa qoqys óńdeý jabdyǵyn satyp aldy. Al ákimdik óz tarapynan osy ýaqytqa deıin zaýyttyń qurylysyn qamtamasyz etken joq. Jabdyq ashyq aspan astyna qalyp, kepildik merzimi aıaqtaldy. Tehnıkanyń 1 mıllıon eýro turatyn bir bóligi jaramsyz bolyp qaldy», - dedi ol.

Aıtýynsha, respýblıkadaǵy 12 myń eldi mekenniń tek 3 myńynda qatty turmystyq qaldyqtar polıgony bar. 

«Bul 23,8% degen sóz. 9 myńynda ondaı polıgon atymen adam joq. Qaıta óńdeý máselesin sheshý Ekologııa mınıstrliginiń «Jasyl Damý» operatoryna júkteldi. Operatordyń mindeti – jobalardy qarjylandyrý. Qazir ekologııa mınıstrligi osy maqsattarǵa shamamen 235 mıllıard teńge bólip otyr. Semeı jáne Aqtóbe qalalarynda qoqys óńdeý zaýyttaryn salý kezinde oryn alǵan qatelikter sııaqty tıimsiz shyǵyndardyń aldyn alý mańyzdy», - dedi Ashat Aýqatov.

Aıta keteıik, Májiliste ótip jatqan qorshaǵan ortany qorǵaý týraly dóńgelek ústelde Ekologııa jáne tabıǵı resýrstar mınıstri Erlan Nysanbaev qoqys polıgondaryna qoıylatyn ekologııalyq talaptardy jeńildetýdi usyndy.