Semeı ákimi Qazaqstan shahmat federatsııasy fılıalynyń basshysy boldy
Abaı oblysynda Qazaqstan shahmat federatsııasynyń fılıaly ashyldy. Onyń tóraǵasy bolyp Semeı qalasynyń ákimi Nurbol Nursaǵatov taǵaıyndaldy, dep habarlaıdy QazAqparat.
QR shahmat federatsııasynan málim etkendeı, sondaı-aq búgin Semeıdiń úzdik áýesqoı shahmatshylary arasynda týrnır ótti. Ol «Shahmat kerýeni» respýblıkalyq jobasynyń aıasynda uıymdastyrylǵan. Joba óńirlerde atalǵan sport túrin damytý maqsatynda qolǵa alynǵan. Semeıge deıin «Shahmat kerýeni» Kókshetaý, Petropavl, Qostanaı, Qaraǵandy, Pavlodar qalalarynda bolyp qaıtty.
«Bul – táýelsiz Qazaqstan tarıhynda buryn-sońdy bolmaǵan oqıǵa. Biz alǵashqylardyń biri bolyp Uly Jibek jolyn jalǵastyrdyq. 14 myń shaqyrymdaı sapar shegip, ár óńir ortalyǵyn aralaımyz. Shahmattan jetken jetistikterimiz halyqaralyq arenada úlken tanymaldylyqqa ıe bolyp kele jatyr. Endi aımaqtardyń qoldaýyn sezingimiz keledi. Ulttyń zııatkerlik áleýetin damytý úderisine tek shahmatshylar ǵana emes, barsha jurtshylyq, kásipkerler men jergilikti atqarýshy bılik ókilderi atsalyssa eken deımiz. Shahmat – qarapaıym sport túri ǵana emes. Mysaly, ony mektepte oqytý arqyly biz balalarymyzdyń damýyna qosymsha serpin beremiz», – dedi týrnırdiń ashylý saltanatynda Qazaqstan shahmat federatsııasynyń vıtse-prezıdenti Aleksandr Babenko.
Tóreshilerdiń sheshimimen I oryndy Arlan Abýzýarov ıelense, II oryn Farhad Mansurovqa, III oryn Aqylbek Jaqsylyqqa buıyrdy. Úsh jeńimpaz da Túrkistanda ótetin grand-fınalǵa joldama aldy.
