Semeı ákiminiń rezıdentsııasy satylady

SEMEI. QazAqparat - «Semeı qalasy ákiminiń apparatyna» tıesili qala syrtyndaǵy keń saraıdaı úsh kottedj kýrortymen, úsh turǵyn úıimen saýdaǵa qoıyldy. Bul týraly qala ákimi Ermak Sálimov jýrnalıstermen ótken kezdesýde málimdedi, dep habarlaıdy QazAqparat.

Qala syrtyndaǵy rezıdentsııa 158 mln teńgege baǵalanyp otyr. Ázirge qyzyǵýshylyq tanytqandar kóp bolǵanymen, satyp alýshy tabylmady. Jýrnalıstermen ótken jıynda qala ákimi Ermak Sálimov Semeı qalasy ákiminiń apparatyna tıesili nysannyń ne úshin satylymǵa shyǵarylǵanyn túsindirdi. Onyń aıtýynsha, búgingi kúni rezıdentsııa qańyrap bos tur. Sondyqtan satý týraly sheshim qabyldanǵan.

«Men bul rezıdentsııada turdym. Alaıda qys mezgilinde eki ret ókpeme sýyq tıip, aýyryp qaldym. Áıelim de aýyrdy. Qazir qalada turamyn. Onda ákim jáne ákimniń orynbasary da turdy. Bul úshin biraz qarajat jumsaldy. Búginde bos tur. Osy ýaqyt aralyǵynda túrli usynystar keldi. Sondyqtan biz rezıdentsııany satý týraly sheshim shyǵardyq», - dedi qala basshysy.

Rezıdentsııany satý-satyp alý kelisimshartynyń talabyna sáıkes, satyp alýshy tek óziniń otbasyna, týǵan-týys, dostaryna ǵana emes, qala qonaqtary men turǵyndary úshin qyzmet kórsetýge mindetteledi. Sonymen qatar, baza aýmaǵyn abattandyrýy kerek.

«Biz bazany kez kelgenniń qolyna bermeımiz. Baıqaý jarııalandy. Satýǵa qoıylǵan soma az qarajat emes. Rezıdentsııanyń ornalasqan jeri óte yńǵaıly. Qyzyǵýshylyq tanytyp jatqandar kóp, biraq naqty satyp alýshy áli tabylǵan joq»,- dedi Ermak Sálimov.

Foto: gosreestr.kz